Jingkhynra nongbylla bar Jylla | Hapoh 12 sngi, beh krad ka KSU ia palat 2500 ngut ba wan rung be-ain

Shen yn iakynduh ia ki para sengbhalang ban rai tyngeh

Shillong, Naitung 17: Ka Khasi Students’s Union (KSU) kala beh krad ia palat 2500 ngut ki nongbylla bar jylla kiba wan rung be-ain khlem kot khlem sla sha Jylla, ha ka jingkhynra Labour Licence bad Work Permit da ka seng ha kylleng ki jaka ka Ri-lum Khasi Jaintia, ha kine ki 12 sngi bala leit noh.

Ia kane la pyntip da u President ka KSU samla Lambokstarwell Marngar ha ka jingrakhe ia ka lyngkhuh sngi iap ba 189 jong u Nongiakhun Laitluit ka Ri-lum Khasi-U Tirot Sing Syiem-uba iakhun thma pyrshah ia ka Sorkar Bilat, kaba long hynne ka sngi Balang ha Nongbah Shillong.

U Samla Lambokstar ula pynbna ruh ia ka rai jong ka KSU ban nang pynkhlain ia ka jingkhynra kum ka dak ban pyrshah ia ka jingbym lah jong ka Sorkar Jylla ban pyntreikam ia ki ain kiba la don lypa ha Jylla kynthup ia ka Meghalaya Residents Safety & Security Act (MRSSA), 2016 nalor ban pynbor ia ka Sorkar Pdeng ban pyntreikam noh ia ka Inner Line Permit (ILP) ban pyrrkhing ia ka jingrung kyrthep ki bar jylla sha Jylla.

Kat kum ka jingong jong u, ka KSU kan sa iakynduh shen bad kiwei ki para Sengbhalang ban shim rai halor kiwei pat ki sienjam ba dei ban shim ha kaban leh eiei halor kane ka mat kaba kongsan.

Haba kren ha ka jingialang, u samla Lambokstar ula ong “Ngin iai bteng ban pynjur ia ka jingtalai ia ki kot ki sla jong ki nongbylla bar jylla wat hapdeng ki jingkem jong ki Pulit ia ki dkhot ka Seng”.

“Palat 2500 ngut ki nongbylla bar jylla la shem ba kila wan bylla khlem ki kot ki sla kiba biang. Ka jingkylli kamih ruh la kine ki briew ki dei ki nongshongshnong ka India ne kumno”, ula ong haba bynrap “Ngi kwah ruh ban tip ba haduh katno tylli ki case ba ka Sorkar kala mudui pyrshah ia ki nongbylla bar jylla ba khlem kot khlem sla bad kaei kaba kila leh pyrshah ia ki contractor kiba pynkhein ia ki Rules”.

“Ha ka jingshisha, ngi lei ngi pyrshang ban iarap ia ka Sorkar ban lah pyntreikam bha iaki ain kiba la don lypa hynrei ngi la shah kynnah pynban ba ngi shim ia ka ain hala ka jong ka kti. Ka KSU lem bad kiwei ki Sengbhalang kila shah pynbor ban leh eiei khnang ba kan long ka jingkyrsiew thiah ia ka Sorkar Jylla” ong une u Nongialam ka KSU.

Haba pynpaw ba ka don ka jingbym iasngewthuh kaba khraw bha, une u Heh ka KSU ula ong ba watla u Myntri Rangbah ka Jylla ula kam ba ka Work Permit kam don hynrei ka Sorkar Jylla ha u 2011 kala wanrah ia ka amendment ia ka Meghalaya Inter-State Migrant Workmen (Regulation of Employment and Condition of Service) Rules, 2011 ban thung haduh 39 ngut ki Labour Inspector ki ban leh eiei halor ka jingrung kyrthep ki bar jylla.

“Ngi la iohi ruh ia ka The Meghalaya Identification, Registration (Safety & Security) of Migrant Workers Act, 2020 bala mynjur da ka Sorkar Jylla. Kane kala pynkulmar jingmut namar ngim tip shuh kano kaba dei bad kano kaba bakla” ula ong haba bynrap “Ta ka daw ngi la ong ba ha ka jaka ban pynkhlain ia ki ain bala don lypa, ka Sorkar kala pyrshang pynban ban pynduh ia ki. Kala pulom ha ka jingpyntreikam ia kine ki ain bala don lypa”.

“Lada ngi dei ki bym ioh bor ban pynlong ia ka jingtalasi balei pat ba ka Sorkar, kaba don ia ka bor ban leh ia kata, kam shym la leh eiei halor kane ka kam?. Ngi la iohi dang shen, 6 ngut ki nong Bangladesh la ioh kem na Shillong bad ka jing kylli ka mih ba kumno kine ki briew ki ioh ban rung sha u pud u sam jong ngi? Kane ka pyni ia ka jingtlot jong ka Sorkar bad kala buh ia ka jingma kaba khraw ia ki paid riewlum trai Jylla lada kim kyndit noh na ka jingiohthiah lyngngai” ula ong.

Ha kajuh ka por, u Samla Lambokstar ula thalain tyngeh ia ka Sorkar Jylla halor ka jingpyndik ia ki dkhot jong ka Seng da kaba hukum ia ki Pulit ban leit kem ia ki ha ka por mynmiet.

“Haba kylli, ki Pulit kila kam ba ka dei ka hukum kiba najrong hynrei ngi tip ba ka jingbthah hi kala wan na ka Sorkar. Nga kwah ban ong hangne ba ka jinglong Myntri lane Nongmihkhmat paidbah kam dei satia ka kam kaba neh shirta, ka dei ka kam contract ba tang san snem. Namar kata, ki rit ki ria ki don ia la ka jong ka bynta ban leh bad ka por hi kan sa batai ia kane” ula ong.

“Namar kata , ngin sa rai ia kaei kaba ngi dei ban leh nangne shakhmat hynrei ka jingtalasi hi kan iai bteng wat hapdeng ki sienjam ba pyrshah bala shim da ka Sorkar Jylla” ula ong.