Nongkhlaw, Naitung 17 : Ka Hima Nongkhlaw hynne ka sngi Balang, kala plie paidbah ia ka Museum bad ka Cultural Centre ha Nongkhlaw ban pynsahnam ia u Tirot Sing Syiem haba rakhe ia ka lyngkhuh sngi iap ba 189 snem jong une u khla wait ka Jaidbynriew.
Kane ka Museum bad ka Cultural Centre ka dei kaba la tip kum ka Tirot Sing Syiem Museum and Cultural Centre of Indigenous Kwonledge, kaba la pyntrei da ka Tnad Arts & Culture ka Sorkar Jylla.
Ia kane ka Museum bad Cultural Centre la plie paidbah da u Myntri ka Tnad Arts & Culture ka Jylla Bah Paul Lyngdoh kum u kongsan ha ka jingiadonlang u MLA ka Mairang Bah Metbah Lyngdoh, u Principal Secretary ka Tnad Arts & Culture Bah FR Kharkongor, u Syiem ka Hima Nongkhlaw Bah PM Syiemlieh bad kiwei kiwei ki kynrem ki lyndan.
Kane ka Tirot Sing Syiem Museum and Cultural Centre la pyntrei ha ka jinglut kaba kot T.2.5 klur bad ia ka pisa la bei da ka Ministry of Tribal Affairs ka Sorkar Pdeng.
Hapoh kane ka Museum ki don shibun ki khana shaphang u Tirot Sing, ki tiar ialeh thma, ki tiar sahnam ba u pyndonkam ha ka por ba iakhun thma pyrshah ia ki shipai Bilat nalor ki khana shaphang ka Hima Nongkhlaw bad ka jingthmu synshar jubor ka Ri Bilat kynthup ia ka jingthmu ban shna ia ka surok sha Dhaka.
Kane ka Museum & Cultural Centre kan long ruh ka jaka ka ban ai shibun ki jingtip ia ki nongwad bniah shaphang u Tirot Sing Syiem, kiba kwah ban tih jylliew shuh shuh ia ka jingim ka jong u.
