Shillong, Jymmang 22: U Myntri Rangbah ka Jylla u Conrad K Sangma ha ka Sngi Thohdieng, ula sngap markhmat ia ka jingud jingnam jong ki paidbah ha ka prokram “MLA Connect” kaba la pynlong ha Matchikolgre, Tura, da kaba kular ia ka jingtuklar jong ka sorkar ha kaba iadei bad ki mat naduh na ka jinglum ia ki jaboh jabain, ki jingtei jong ki skul bad ka bai bording elektrik.
“Ka jingiakren markhmat bad ki nongshong shnong ka long kaba kongsan bha ha kaban pynthikna ba ki prokram kam pynroi bad ki projek ha ki jaka sor kidei kiba iaid lang bad ka jingdonkam jong ki paitbah” la ong u Sangma bad ka ong, ba ka sorkar ka kut jingmut ia ka roi ka par kaba iashimbynta da baroh bad ka rukom synshar kaba phaikhmat sha ki paitbah.
Ki nongshong shnong kila pynpaw halor ka jingsniew jong ki surok, kaba la pynlong ia ki trok kiba lum ia ki niut ban ym ioh rung sha ki bynta jong ka shnong ha ka por slap bad kane kala pynthud ia ka jingkhuid jingsuba.
Halor kane, u Myntri Rangbah ula bthah ia ka Tura Municipal Board ban pynbiang ia ki lad kiba shipor ba kan ym don ka jingthud ha ka jinglum ia ki niut bad ong ba ka sorkar kan sa khmih bniah ban lah ban pyntreikam ba kan don noh ia ki kali 4×4 ban lum ia ki niut ban pynbha bad ban plie ia ka lad ban ioh leit niut na ki jaka kiba eh kiba don ha ki jaka longriat.
Ki nongshong shnong kila pynpaw ruh ia ka jingbym biang ka skul Primary ka bym dei ka jong ka sorkar, ka jingbym don ia ka kynroh maw, ka bording elektrik, ka umbam umdih, painkhana bad kila kyrpad ruh ban ai ia ki tiar ialehkai. U Sangma ula pynthikna ba “Ia kine ki mat sngewkhia yn sa khmih bniah bha ban ioh ia ka jingkyrshan kaba donkam bad ia ka jingtuklar”.
Halor ki jingtei kiba iadei bad ki samla, ula pynshai ia ka jingkyrpad jong ka shnong ban tei ia ka madan ialehkai Basketball, ban ai jingiarap ia ki tiar tem tiar put bad ki tiar ialehkai na ka bynta ka Club jong ki samla ban ai mynsiem ba kan don ka jingiashimbynta kaba don jingmut jong ki samla ha ka kam ialehkai bad ka kolshor.
Haba kren halor ki jingujor halor ka jingkiew ka bai bording elektrik hadien ba la dep pyndait ia ki Smart Meter, ki ophisar ka MeECL kila pynshai ba ka jingai ia ka bai bording kadei kaba la pynshong nongrim katkum ka jingpyndonkam ia ka bording elektrik ym shuh kum mynshwa ia kaba la shu antad. Ka kynhun jong ka tnad kan leit ban jurip ia katei ka shnong ha ka Sngi Nyngkong bad la pynthikna ia ki nongshong shnong, “Lada lap ba don kino kino ki jingdkoh kiba shisha ne ki jingeh ha ka rukom ai ia ka bai bording elektrik, kumta yn sa pynbeit noh mardor”.
Katto katne ki iing kim shim la lah ban siew ia kaba bai shim (Connection) ia ka um bad kila pan da ka jingshim ia ka um da kaba leh lang da ki paidbah baroh ne ka Joint Public Connection.
U Myntri Rangbah ula ong, “Ia kane ka mat yn sa khmih bniah da kaba iasyllok bad bad ka tnad kaba dei khmih”.
U Conrad Sangma ula kyntu ruh ia ki nongshong shnong ba kin iashimbynta ha ka jinglum ia ka Census ne Khanasamari bad ka ong, “Ka long kaba kongsan bha khamtam eh ia ki longiing kiba duna ha ka ioh ka kot bad ia ki longiing BPL, namar ki jingtip kiba thikna ki long kiba donkam na ka bynta ka ‘Planning’ kaba ryntih, ki skhim kiba iadei bad ka bha ka miat bad ka jingbuh ia ka thong ban pyndep ia ki jingai jingmyntoi jong ka Sorkar”.
“Ka sorkar ka kut jingmut ban pynkylla ia ka Tura sha ka jaka kaba katkum ka juk ba mynta, ba khuid ba suba bad kaba la pynwandur bha kum ka jaka sor lyngba ki jingkynshew tyngka ha ki jingtei, ka jingpynbha ia ka rukom ai jingshakri ha kaba iadei bad ka khuid ka suba, ka jingpynitynnad bad ka jingthaw ia ki jaka na ka bynta ki paitbah” bad ka bynrap ba ka jingleit jurip jong ki tnad ia ki jaka ka iarap ia ka tnad ban iatreilang bad ban pynkloi ia ka jingpyntreikam ia ki projek.
Ka “MLA Connect” prokram kadei shi bynta jongka ka jingpyniaid shakhmat ka jylla ia ka jingai jingshakri kaba don ia ka jingshimkhia bad ka jingkyntiew kaba salonsar ia ka sor ha kylleng jong ka Tura.
