Shillong, Iaiong 21 : Ka Jylla Meghalaya kala sakhi ia ka jingmih bun bha ki nongthep vote ban pyndep iala ka jong ka hok ban jied nongmihkhmat sha Lok Sabha na Shillong bad Tura, kaba la kot haduh 76.60%.
“Ka jingpoi thep vote hapoh ka Jylla kala kot 76.60%’ ong u Chief Electoral Officer (CEO) Dr BDR Tiwari ha ka sngi Saitjain.
Ka jingpoi thep vote kala kiew da 5.23 % haba ianujor bad ka elekshon Lok Sabha 2019 kaba kot 71.37%. Ka jingpoi thep vote ha ka elekshon Lok Sabha 2014 ka kot 68.48 %.
Palat 22.26 lak ngut ki nongthep vote kila iathep iala ki vote ha ka sngi thohdieng ha kaba 11.27 lak ki dei ki kynthei ba 10.99 lak ki dei ki shynrang bad 3 ngut ki bahkong.
Ka jingpoi thep vote ki kynthei ka kot 78.62% kaba kham bun ban ia ki shynrang kaba kot 74.53 %, ula ong.
Haba ai jingkhein kat kum ki constituency, u Dr Tiwari ula pyntip ba ka jingpoi thep vote ha Tura Parliamentary constituency ka kot 81.37% katba ha Shillong parliamentary constituency ka kot 73.78%.
Ka Assembly constituency jong ka Shillong parliamentary constituency kaba mih bun eh ki nongthep vote ka dei ka Ranikor ha South West Khasi Hills kaba kot 80.55% katba kaba rit duh ka dei ka South Shillong kaba long tang 58.36%.
Katba iaka Tura, ka Rajabala ka dei kaba mih bun eh ki nongthep vote aba kot 87.85% katba kaba rit duh ka dei ka South Tura kaba kot 69.60%. Ka South Tura ka dei kaba mihkhmat da u Myntri Rangbah ka Jylla Conrad K Sangma.
Ha kajuh ka por, u CEO u pyntip ba la pynkhlain bha ia ki bor pahara ban pahara ia baroh ki strong room ha ki 13 tylli ki jaka niew vote jong ki 12 tylli ki District headquarter bad Sohra Civil Sub Division.
Ka jingniew ia ki vote kan long ha ka 4 tarik Jylliew.
