Tura, Iaiong 21 : Arngut ki Khynnah kynthei kila shah shoh bad shah leh beijot ha ka kynhun ki runar ha ka por ba long ka tamasa Chenga Benga Mela ha Gandhipara, kaba don hajan ka Garobadha, South West Garo Hills ha khappud bad ka Assam.
Kat kum ka khubor Pulit, kine ki Khynnah kiba dei na ka jaidbynriew Koch, ki dang leit iaid kai bad arngut kiwei pat ki khynnah shynrang ha ka por ba ka kynhun ki briew ba kren ktien Bengali, kila thombor ia ki.
La kynnoh ba kine ki runar kila shoh ia ki khynnah shynrang bad teh ia ki da ki ksai juti bad ia ki khynnah kynthei pat kila leh beijot.
Ia kine ki khynnah la ialam mar mar sha hospital ban leh medical examination bad la shem bad tang kawei napdeng kine ki khynnah ka don dak ba shah leh beijot.
Ki Pulit ka Jylla kila register case ia kane ka jingjia ha Ampati Police Station hapoh ka POCSO Act bad ka jingtohkit mynta kala iaid shakhmat.
Ki Pulit ka South West Garo Hills kila thaw mynta ia ka kynhun Special Investigation Team (SIT) ban tohkit ia kane ka jingjia bad thwet ia ki runar kiba donkti.
Ka ejahar ka pyntip ba kine ki arngut ki khynnah kynthei kila shah rahbor bad shah leh beijot ha ka kynhun ba 12-15 ngut ki briew ba tap durkhmat, kiba dei na kawei pat ka Jaidbynriew.
Kat haduh mynta, ym pat shym la kem briew satia halor kane ka jingjia.
