Shillong, Iaiong 10: Arngut ki briew kila iap na ka jingkylla jong ka trok 12 shaka hynne ka step sngi Balang ha surok National Highway-6, ha Mawblei, Shillong.
Kat kum ka khubor Pulit, kane ka trok ka dei kaba kit dohkha bad kaba don u nombor plate ka Andhra Pradesh AP16-TS-9689.
Kane ka trok ka dei kaba dang wan na Jowai hynrei haba poi ha Mawblei hajan ka Hyundai showroom, kala kylla noh namar ka jingbym treikam ka brake.
Kine ki arngut kiba iap ki dei ki nongbud jong kane ka trok, kiba la pyrshang ban kynthih nalor ka trok ba dang iaid hashuwa ba kan kylla. Kine ki arngut kila shah bhen ha ka trok hynrei u nongniah ula shu mynsaw malu mala.
Ki Pulit kila pynkit noh ia kine kiba iap sha Civil Hospital, Shillong ban pyndep ia kaba donkam.
