Shillong, Lber 14 : Ka Tnad Sports & Youth Affairs ka Jylla, hynne ka sngi Palei, kala pynlait ia ka Talent Identification (wad sap) ba thymmai bad ka Elite Pathway program (EPP), kiba hap hapoh ka STAR Program, ban wad bad kyntiew ia ki sap ialehkai jong ki samla ka Jylla.
Ia kine ki prokram wad sap ialehkai la pyllait ha ka jingialang bala pynlong da ka Tnad Sports & Youth Affairs ha NEHU, ban rakhe ia ka jingdon sap jong ki samla ka Jylla ha ka liang ka kam ialehkai bad kiwei kiwei.
Palat 500 ngut ki samla na kylleng ka Jylla kila shah khot sngewbha kum shibynta jong ki skhim bapher bapher bad ki prokram bala pyntrei da ka Tnad.
Kawei na kine ki prokram ka dei ka jingpynlait ia ka Talent Identification ba thymmai bad ka Elite Pathway program (EEP), hapoh ka STAR Program, ha ryngkat ka jingiatreilang bad ka Meghalaya State Olympic Association (MSOA).
Haduh mynta, haduh 14,500 ngut ki samla kila wan ban shah bishar ha ka Talent Identification Program kaba la pyndonkam da ki kor saian ban lap ia ki nongialehkai kiba don bha ia ka sap. Lyngba ka EPP, 200 ngut ki nongialehkai kila leit sha ka jinghikai pyntbit ba shisnem da ki Camp ba shisien lai bnai bad ka jinghikai lyngba ki application.
Ha kane ka kylla jong u 2024-25, haduh 10,000 ngut ki nongiashimbynta, katto katne ki dei kiba dang 6 snem ka rta, kin shah bishar hapoh ka Talent Identification program bad sa 200 ngut ki nongialehkai kin leit ia ka 2nd EPP camp.
Ha kane ka prokram la ai khusnam song pisa ruh sha ki nongialehkai kiba ioh rah takma ha ki lympung ialehkai bapher bapher. Haduh 297 ngut ki nongialehkai bad ki Coach kila ioh ia ka song pisa ba T. 68 lak broh lang.
Nalor kane, la sam ruh ia ka sport scholarship sha ki nongialehkai jong une u snem. Ia kane ka scholarship yn sdang sam naduh u bnai Iaiong 2024 haduh u Lber 2025.
Ka Tnad Sports & Youth Affairs kala pynkup burom ruh ia ka kynhun ialehkai ka Meghalaya kiba dang wan n aka 7th North East Youth Festival, kiba la wanrah nam ia ka Jylla. Kine ki kynthup ia ki nongjop jong ka Rock band Evet, bad 1st Runners Up ia ki 6 tylli kiwei pat ki event.
Ia kane ka prokram la pynshongkun da ka jingiadonlang u Myntri Rangbah ka Jylla Conrad K Sangma, u Chief Secretary ka Jylla Bah DP Wahlang, ka Director ka Tnad Sports & Youth Affairs Isawanda Laloo, bad u Working President ka MSOA Bah John F Kharshiing.
