Shillong, Lber 14 : Ka Sorkar Jylla kala mynjur ban iatehlok bad ka North East United Football Club (NEUFC) kaba long trai da u aktor ha Bollywood John Abraham, ban kyntiew ia ka jingialehkai phutbol hapoh ka Jylla Meghalaya.
Kane ka jingiatehlok ka long hapdeng ka Tnad Sports & Youth Affairs ka Jylla bad ka NEUFC. Ia kane la pynbna ha ka jingialang ba pynsdang ia ka Talent Identification and Elite Pathway Programs 2024-25 bad jingpynkup burom ia ki samla ba wanrah nam ia ka Jylla na ki jingialehkai bapher bapher, kaba long ha SAI, NEHU, Shillong.
Ka Tnad Sports ka Jylla kala mynjur ban ai ia ka jaka kaba don ha Mawkhanu, East Khasi Hills sha ka NEUFC, ka ban sa tei ia ka Residential Football Academy, na ka bynta ki kam kilan met jong ka kynhun ialehkai ka NEUFC bad ki rang ialehkai phutbol ka Jylla.
La pyntip ba ki jingiakren kin dang iaid kat kum ki kyndon treikam jong ka Sorkar ban lah pynurlong ia kane ka jingiatehlok.
Ha kane ka jingpynbna, la iadonlang ruh u John Abraham, trai jong ka NEUFC.
