Shillong, Lber 14: Lai ngut ki khynnah ialehkai ka Meghalaya Cricket Association kila shah jied sha ka All India Junior Selection Committee (U-16 Boys) jong ka BCCI ban iashimbynta ha ka U-16 Boys Zonal Cricket Academy (ZCA) Camp jong ka National Cricket Academy (NCA) kaban sdang naduh ka 19 tarik u Iaiong haduh ka 15 tarik u Jymmang 2024.
Kine ki nongialehkai ki kynthup ia u Gaurav Jyoti Thakuria, u Dipayan Nandi bad u Apandanka Marak bad kine kila shah jied halor kaj ingialehkai bha ka jongki ha ka U-16 Boys Vijay Merchant Trophy, kaba la long ha u Nohprah 2023 haduh u Kyllalyngkot 2024 ha kaba ka Meghalaya kala wan baar ha ka Plate Group.
Ka jingtbit kine ki nongialehkai kala pynlong ia ki ban ioh jaka ha ka ZCA Camp kaban long ha Surat, Cuttack bad Jaipur ha kaba kin ioh ia ka jinghikai na ki Coach kiba pawnam jong ka ri.
U Apandanka ula wan ha ka kyrdan kaba lai ha ka jingioh khur wiket ha ka ri, ha kaba ula ioh 48 wiket na ki 7 tylli ki jingiakhun bad ioh khur 5 wiket 5 sien, katba u Gaurav Jyoti Thakuria ula ioh khur 31 wiket na ki 7 tylli ki jingiakhun bad ula ioh shim 3 sien ia ka 5 wiket.
U Dipayan, ula kamai 393 run ha ki 7 tylli ki jingiakhun bad ula ioh 4 tylli ki Half Century bad ula wan ha ka kyrdan kaba 30 na ki nongtied kiban kamai bun run ha ka Tournament.
