Shillong, Lber 06 : U Chief Executive Member (CEM) ka KHADC bah Pyniaid Sing Syiem ha ka sngi Balang ula ong ba ka jingiakhih bala ialam da u President ka Voice of the People Party (VPP) Bah Ardent M Basaiawmoit pyrshah ia ka jingpyntreikam ia ka Building Byelaw da ka MUDA ha u snem 2015 ka dei kaba khlem poi shano shano ruh.
Kat kum ka jingong jong u, ka kam ba iadei bad ka building byelaw ka dei kaba la pynbeit hadien ka jingshimti ia ka bor synshar da ka sorkar synrop Meghalaya Democratic Alliance (MDA) ba ialam da ka NPP ha u snem 2018.
Haba iakren bad ki nongthoh khubor, u Bah Pyniaid ula ong “Ka jingiakhih pyrshah ia ka MUDA bala ialam da u President ba mynta ka VPP Bah Ardent Basaiawmoit ha ka por jong ka Sorkar u Dr Mukul Sangma ha u snem 2015, ka dei namar ka jingheh dor palat jong ka building permission, building cess, labour cess bad kiwei kiwei. Hynrei, kane ka jingiakhih kam shym la poi shano shano ruh”.
“Ka dei tad hadien ka jingshimti ka Sorkar MDA ia ka bor synshar ha u 2018 bad ha ka por ba long Myntri kam pynroi sor u Bah Hamletson Dohling, ia ka building byelaw ka MUDA ha u 2015 la pynsangeh noh bad ka KHADC (bad artylli ki ADC) kila iohbor lang kum ki nongpyntreikam ia ka building bye-law” ula ong.
U pyntip ruh ba mynta kala don ka jingiapher bak ly bak halor ka dor bala buh da ka KHADC bad ka dor bala buh da ka Sorkar ha u snem 2015. “Kane kala ai jingmyntoi bha ia ki paidbah, kiba ioh ruh ka lad ban pynthikna ia ka jingtei iing kaba shngain” ong u CEM.
