Ngin weng ia ka jingthmu jingiakhih lada u Modi u lah ban pynsngewthuh halor ka CAA, ong u Heh Congress ka Assam

Guwahati, Lber 06: U President jongka Assam Pradesh Congress Committee(APCC) u Bhupen Kumar Borah ha ka sngi baar ula ong ba kila dep phah ia ka shithi ia u Myntri Rangbah duh ka ri u Narendra Modi ban pan ia ka por ban iakynduh ia u hynrei kim shym la ioh ia kano kano ka jingpyntip haduh mynta.

Haba iakren bad ki lad pathai khubor u Bhupen Kumar Borah ula ong, “Ngi la phah ia ka shithi ban iakynduh ia u Myntri Rangbah hynrei mgim shym la ioh ia kano kano ka jingpyntip haduh mynta.Ha ka shithi ngi la kdew ba ngi kwah ban iakynduh ia u ha Assam ne Delhi. Ha ka jingiakynduh ia u ngi kwah ban pynsngew ha u ia ka daw kaba ngi pyrshah jur ia ka Citizenship Amendment Act (CAA) bad lada u Myntri rangbah duh ka ri u lah ban pynkohnguh ia ngi ba ka CAA kan ai jongmyntoi ia ka Assam bad lada ngi sngewhun ngin pynsangeh noh ia ka jingthmu ban pynlong jingiakhih”.

“Lada u Modi ym ai por ia ngi ban iakynduh, baroh 16 tylli ki seng saiñ pyrthei kila dep phah ia ka shithi sha ka President jong ka ri India lyngba u Lat ka jylla Assam hynrei haduh mynta kim shim la ioh ia kano kano ka jingpyntip.
Lada ia ka jingkyrpad jong ngi kam don ka jingshimkhia kumta ngim don lad shuh kata tang ban shu pynlong ia ka jingiakhih,” ong u Borah.

Hadien ba ka Sorkar Pdeng kala pynbna ban pyntreikam ia ka CAA shwa ka elekshon, ki seng saiñ pyrthei kiba don ha ka Liang Pyrshah bad ka All Assam Students’ Union (AASU) kila pynbna ban pynlong ia kiba bun ki jingiakhih ban pyrshah ia ka CAA hynrei kila pynkynriah noh ia kitei ki jingiakhih namar ka jingdon eksam ki khynnah pule.

Ha kawei pat ka liang, u Myntri Rangbah ka Assam u Himanta Biswa Sarma ula kam ba kam don nongrim kano kano ka jingiakhih ban pyrshah ia ka CAA ha kane ka por bad ula ong ba baroh kina pyrshah ia katei ka aiñ ki lah ban leit ujor sha ka Supreme Court ban phah pynduh noh.