Shillong, Lber 06: U Myntri ka Arts & Culture u Bah Paul Lyngdoh ryngkat bad u MLA ka South Shillong Constituency u Bah Sanbor Shullai hynne ka sngi Balang kila buh ia u mawnongrim na ka bynta ban tei ia ka Tagore Cultural Complex ha Brookside Rilbong, Shillong.
Ia kane ka Complex yn tei ha ka jinglut jingsep kaba kot T.14.58 Klur bad ka tnad Arts & Culture kala ioh pdiang T.5 Klur ha ka wat kaba nyngkong bad ia kane ka Complex yn sa sdang noh hadien ka elekshon.
U Bah Paul Lyngdoh ula ong, ba kadei ka sngi kaba khraw ba kane ka Complex kan sa urlong noh bad mynta ka sngi kadei ruh ka jingdap shi snem jong kane ka Sorkar MDA bad kane ka long kum ka jingai sngewbha ia ki nongbud bad kiba ieid ia u Rabindranath Tagore.
Ula ong ba ka Nongbah Shillong kam dei tang ka kyrteng, ka Nongbah ne ka jaka hynrei kadei ka shlem jongka Kolshor bad kadei ruh ka dak jongka jingnang kiew ka imlang sahlang haba pynkynmaw ia ka histori jong ka jingiadei hapdeng ka Shillong bad ki riewpawkhmat na Bengal kum u Rabindranath Tagore bad u Subhas Chandra Bose.
Ula pyntip ruh ba dang shen, la plie ia u mot bad ia ka Library jong u Tirot Sing Syiem ha Dhaka bad mynta u Tirot Sing ym dei shuh tang u Khlur ka jylla hynrei ula kylla long u Khlur ha kylleng ki ri.
Ula pynpaw ba ka dei ka jingangnud jong ka sorkar jylla ban pynkylla ia katei ka jaka (Rilbong) kum ka Tagore Cultural Centre khamtam ba ka dei ka jaka kaba u Tagore ula thoh ia ki jingthoh kiba pawnam bad kane ka Centre ka thmu ban long kum ka Kolshor ba long salonsar ne Global Cultural, kaban pyniasoh ia ka Shillong, Dhaka bad ka West Bengal.
Ula ong, ba ym dei tang u Tagore uba la wan sah ha Shillong hynrei wat u Subhash Chandra Bose bad wat u Mirad C Chaudhary ula wan ban sah kai ha Upper Shillong.
U Bah Paul ula ai khublei ia u Bah Sanbor Shullai bad u Bah AL Hek kiba dei ki Myntri barim ryngkat bad ia u Myntri Rangbah ka jylla kiba la shimkhia shaduh Delhi ban pynioh ia kane ka projek.
Haba kren ha ka jingialang u Bah Sanbor ula ong, ha ka por ba u la shimti kum u Myntri ka Sorkar Jylla ha ka 27 tarik u Naitung 2021 bad ula sdang ban shimkhia ban pynioh ia ka bhah tyngka ia kane ka project da kaba leit shaduh sha Delhi.
U Bah Sanbor ula ai khublei ia u Jai Kishan Reddy uba la pynmih ia ka hukum ban bhah ia ka Mang tyngka na ka bynta kane ka projek bad ula ai khublei ia baroh ki heh ophisar kiba la shimkhia ban buddien ia kane ka kam.
