Nongpoh, Rymphang 25 : Ki paidbah ka thain Patharkhmah, kila iamih paidbah ban iashimbynta ha ka jingialang thang mombiti, ban pynpaw ia ka jingsngewlem halor ka jingshah pyniap u heprit 10 snem ha Shnong Umtangar, Ri-Bhoi District.
Ia kane ka jingialang thang mombiti la pynlong da ka KSU, FKJGP Western Border Area bad ka RBYF Patharkhmah Circle ha ka sngi Saitjain ha Iew Patharkhmah.
Kine ki sengbhalang kila pynlong ruh ia ka jingiasoi paidbah (signature campaign) ban dawa ia ki bor ka ain ban ai da ka jingpynsajia ba tyngeh kata da kaba set phatok shi jingim ia ki 2 ngut ki runar kiba pyniap ia une u khynnah.
Ha katei ka signature campaign la wan ruh ban shim bynta da ki nongïalam ki 3 seng naduh u Bah Center Doloi President FKJGP, Bah Receive Pator President KSU, Samla Rishan Nongtri President RBYF Patharkhmah Circle, Bah Enias Ranee President Western Ri Bhoi Dorbar, Fr. Michael Sun Parish Priest ka Umkadhor parish, Paiem H Wahlang Syiem ka Hima Jirang bad kiwei kiwei ki riew rangbah naka thaiñ Patharkhmah.
Ki riew rangbah ryngkat ki paidbah kila pynrem jur ia katei ka jingjia kaba la pynpar ñiangkhriat bad pynsyier ïa kiba bun ba lang khamtam ki kynthei khynnah bad ka rai hi bala shim ha katei ka sngi ka long ban ai ka jingpynsajia da kaba set phatok shi jingim ïa ki runar ba donkti.
Naka liang kitei ki lai seng kila buh ruh da ka synduk synniang sngewlem ha katei ka sngi ha kaba ki paidbah ki lah ban noh synniang kat kaba lah ban ai shaka kmie bad u kpa jong une u heprit, kiba la wan iadonlang ha kane ka sngi.
