Nongpoh, Rymphang 25 : Kawei ka Auto Truck bad ka JCM kiba pynieng ha phyllaw jong kawei ka Iing, kila jan ingkhong na ka jingshah kawang petrol bomb ha ki runar ha Umsning Patarim.
Kane ka jingjia kala jia hynne ka step phyrngap por 1:20 eiei, ong ki Pulit kiba iathuh ba ki briew ki bym ithuh durkhmat, kila leit ban kawang petrol bomb ia kine ki kali ha ka jaka ba ki pynieng.
Ki Pulit ki iathuh ba kine ki kali ki dei kiba pynieng ha phyllaw iing jong u Bah Lovercuf Nongshli kaba don ha Shnong Umsning Patarim, kaba hap ha ka Umsning Police Outpost. Ia kane ka kam la iohi noh da ki trai iing kiba la kloi ban leit pynlip ia ka ding da kaba theh um.
Ki Pulit ki iathuh ba kane ka Auto Truck kaba don u nombor ML10-A-4205 ka dei jong uwei u bar jylla bala tip kyrteng u Horander Prasad bad ka dei kaba ju pyndonkam ban kit ia ki mar.
Ki Pulit kiba ioh jingtip ia kane ka jingjia, kila hiar mardor sha katei ka jaka ban pynlong ia ka jingtohkit bad ka jingthwet mynta ia ki briew ba donkti kala iaid shakhmat.
Ki iathuh ba ha kane ka jingjia, ym shym la don satia kano kano ka jingjia ba sngewsih lait noh tang ka jingjulor ba malu mala ia ka Auto Truck.
Ki Pulit kila register case ia kane ka jingjia ha Umsning Police Outpost bad ka jingbuddien ia ki runar kala iaid shakhmat.
