Jowai, Rymphang 03: Dang ha u bnai ba-ar jong u 2024, ka Jylla kala sakhi ia ka jingtwa khyndew kaba nyngkong eh mynta u snem ha Tunnel Sonapur, East Jaintia Hills District, kaba la ktah lut ia ka iaid ka ieng ki kali ha NH-06.
Kane ka jingtwa khyndew kala jia hynne ka step sngi saitain, ong ka khubor Pulit.
Ki Pulit ka East Jaintia Hills kila pynmih wut wut ia ki jingbthah halor ka jingiaid kali hapoh ka thain namar kane ka jingjia. Ki pulit ka tnad PWD kala shimkhia mynta ban pynkhuid lut ia ka khyndew kaba twa khnang ban lait iaid ki kali.
Ki Pulit kila kyntu ia ki nongniah kali ba kin da phikir bha haba iaid ha kane ka jaka ba twa khnang ba kin lait na kino kino ki jingjia kiba buh jingma ia ki.
Lah ban kdew hangne ba ka thain Sonapur ka dei ka jaka kaba jur bha ka jingtwa khyndew manla u snem khamtam ha ka por lyiur. Ha u snem bala lah, ka jingtwa khyndew kala khang lynti syndon ia ka Tunnel ha kaba bun bah ki kali khamtam ki kali heh kila sahkut da ki sngi.
Kane ka Tunnel ka dei ka lynti iaid kaba kongsan bha ia ka Jylla namar ka dei kaba pyniasoh ia ka Meghalaya sha Silchar, Assam bad ki Jylla jong ka Mizoram bad Tripura.
