Shillong, Rymphang 03: Ka bor pyniaid District ka East Khasi Hills ha ka sngi Saitjain, kala pynlong ia ka jingpynkhuid paid bah ia ki Wah bad ki shnong ba marjan ka Wah Umkhrah bad Umshyrpi kum ka jingpyrshang ban pynitynnad bad wanrah pat ka khuid k suba ha kine ki artylli ki wah jong ka Nongbah Shillong.
Kane ka jingpynkhuid paidbah ia kine ki wah ka dei ruh shibynta na ka jingpynkhreh ia ka jingwan jong ka International Water Conclave ka ban long ha ka 9 bad 10 tarik Rymphang ha Shillong.
Ha kane ka jingiapynkhuid shnong la wan iashimbynta da ki dkhot ka NCC, ki Dorbar Shnong ba iaid lynti kine ki wah, ki SHG jongki Longkmie bad ki Tnad kiba iadonbynta kum ka Water Resources, Shillong Municipal Board, Forest & Environment, PHE, PHW bad kiwei kiwei.
Ia kane ka jingpynkhuid wah la pynlong ha ki thain Polo, Lawmali, jingkieng Wahingdoh,Mawprem bad ki jaka ba marjan.
