Shillong, K’lyngkot 03: Ka seng ki Jaidbynriew Koch- ka Meghalaya Koch Association kala dawa ia u Myntri Rangbah ka Jylla Conrad K Sangma ba un tuklar lem ha kaban ai jingiada bad kyntiew ia ka ktien ka thylliej jong ki hapoh ka Jylla bad ban pynmih ia ka Koch Human Resource Index hapoh ka Jylla.
Kane ka seng ki Koch kala aiti da ka dorkhas sha u Myntri Rangbah ka Jylla ha ka 5th Annual Conference kaba long ha Jatrakona, South Garo Hills hynne ka sngi Saitjain.
Haba iaroh ia ki kam bhalang bala wanrah hapoh ka Jylla, ka Meghalaya Koch Association kala dawa ban wanrah lang noh ia ka ktien Koch ha ka jaka jong ka ktien Assamese lane Bengali ban pule ha ki skul Lower bad Upper Primary jong ki shnong ba shong ba sah ki Koch.
Kane ka jingdawa jong ka Jaidbynriew Koch ka dei kaba iaid ruh kat kum ka New Education Policy kaba la bthah ban pynleit jingmut halor ka jingai jinghikai da ka ktien tynrai (mother tongue) ha ki jaka pule tad haduh ba kin da poi ha ka kyrdan 8 standard kat kumka kyndon 29 (F) jong ka Chapter V hapoh ka Right to Education Act, 2009.
Haba kren ha ka jingialang, u Myntri Rangbah ula ai ka jingkular ia ka Jaidbynriew Koch ba ka Sorkar kan sa pynrung lang noh ia ka ktien Koch hapoh ka Jylla.
Ka dorkhas kala kyrpad ruh ia ka Sorkar Jylla ban ai song pisa ha ka dur jong ka grant ban buh ia ki Career Counseling Centre ha ki Shnong Koch ban kyntiew ia ka jingnang jingstad jong ka Jaidbynriew.
