Shillong, Naitung 30 : U Symbud Myntri Rangbah ka jylla, Bah Prestone Tynsong u la kyntu ia ki nongialam jong ka BJP Meghalaya ba kin iai shah shwa katba ka jingtohkit ia u Bernard Marak, MDC ka BJP bad ka jingkhot hajir ia ki nongtrei ka dang iaid shakhmat.
Katei ka jingkren jong u Bah Prestone kadei hadien ba ki nongialam ka BJP ki thmu ban pynlong da ki jingiakhih da kaba kynnoh ba ka don ka jingshah pyndik bad shah thombor ki nongialam ka party halor ka jingjia kaba iadei bad ka jingkhynra ia ka farmhouse jong utei u MDC ka BJP dang shen kaba don ha Tura.
“Ka jingkam ba ki nongtrei party ki shah pyndik kam don nongrim satia namar ki pulit ki pyndep ia ka kamram ban wad bniah halor ka jingjia hapoh ka farmhouse kaba long trai da u Bernard ba dei ruh u Vice President ka BJP,” ong u Bah Prestone.
U ong ruh ba ki nongialam ka BJP ki dei ban sngewthuh ba katei ka jingkhot hajir ka long ban wad bniah haba iadei bad katei ka jingjia.
