Shillong, Nohprah 13: U Symbud Myntri Rangbah ka Jylla u Bah Sniawbhalang Dhar uba khmih ruh iaka tnad Urban Affairs hynne ka sngi Balang, ula leit ban jurip iaka Ïew kaba la tei thymmai ha Laitumkhrah ban buddien ia ka jingpyntrei ia ki kam ki jam baroh.
Ha kane ka sngi la wan synran lang da ka Myntri ka tnat ka koit ka khiah ka Kong Ampareen Lyngdoh kaba dei ruh ka MLA jong ka East Shillong constituency, ha kaba la iadonlang ki heh ophisar naka tnad Urban Affairs bad na ka Shillong Smart City Project.
Haba kren sha ki lad pathai khubor u Bah Sniawbhalang ula pyntip ba la mang T.38 Klur ban tei iaka ïew thymmai ha Laitumkhrah bad ka thong kadei ban pyndep haka taiew ba nyngkong jong u bnai Lber 2024.
U Bah Sniawbhalang ula iathuh ba u dap da ka jingkmen ban iohi ba ka jingpyntrei iaki kam ki iaid beit iaid ryntih.
“Watla ki kam ki iaid beit iaid ryntih bad ha ka por kaba biang hynrei namar ka khlam COVID-19 kala don ka jingshah pynsangeh teng haki snem bala dep hynrei ka Sorkar ka buh iaka thong ban pyndep noh hapoh u bnai Lber 2024” la ong u Bah Sniawbhalang.
Ula pyntip ba katkum ka Detail Project Report (DPR) kin don 180 tylli ki dukan bad ka jaka ïeng kali na ka bynta 100 tylli ki kali hapoh ka ïew thymmai ha Laitumkhrah.
