Shillong, Nohprah 13: Ka kyrtong jong ka National People’s Party (NPP) ka ban iakhun haka ilekshon MP sha Lok Sabha 2024 ka Kong Ampareen Lyngdoh kala pynbna ba ha ka 8 lane 9 tarik Kyllalyngkot 2024 kan sa pyntip paidbah iaki sienjam ban sdang iaka jingialap ilekshon.
Haba kren sha ki lad pathai khubor ka Kong Ampareen kala iathuh ba ka dap daka jingsngewkmen namar ba ka NPP ka la ibit ban pyniakhun iaka haka ilekshon MP 2024 na Shillong Parliamentary Seat.
Ka Kong Ampareen ka la ong ba ka jingpynkhreh jong ka iaka ilekshon kadei lypa katkum ka jingim jong ka namar ki paidbah kila ithuh lypa hynrei kala pynpaw ba ka dang donkam shuh shuh ban dang pynkhreh kham bha ban nang ioh jingkyrshan naki paidbah.
Kala ong, ba kum ka kyrtong ka donkam ban hap ban leit sha man ki shnong katba lah hapoh kine ki khyndiat bnai ba sah hashuwa ka ilekshon.
“Ha ka taiew ba nyngkong lane ba ar jong u bnai Kyllalyngkot 2024, ngan sa sdang ia ka jingialap ilekshon bad nga kyrmen ba ki paidbah kin pdiang ïa nga kum ka kyrtong ka NPP” la ong ka Kong Ampareen.
Kala pynpaw ba kan long ka burom kaba khraw lada ka ioh ka jingjop haka ilekshon MP 2024 namar haduh mynta ym pat ju don ki longkmie na Shillong Parliamentary Seat.
“Haka 8 lane 9 tarik Kyllalyngkot 2024 ngan sa pynbna paidbah iaki prokram jingialap ilekshon namar kane kadei ka sien ba nyngkong ba ka Shillong Parliamentary Seat ka ioh kyrtong daka Longkmie ka ba lah ban ioh ka jingjop haka ilekshon MP” kala ong.
