Shillong, Naiwieng 02 : Ka Joint Parliamentary Committee (JPC) ba shong bishar ia ka Foreign Contribution (Regulation) Amendment Bill, 2026, kala wan poi ha Shilllong ban sngap ia ki jingai jingmut bad ki jingsngewkhia jong ki seng niam, khamtam ki Balang Khristan, halor ka jingtyrwa pynkylla ia ka Foreign Contribution (Regulation) Act, 2010.
U Chairman ka JPC Sanjay Jaiswal ula iathuh ba ka Shillong ka dei ka jaka ba nyngkong eh shabar ka New Delhi kaba ka Committee kala pynlong ia ka jingiasyllok. Ula ong ba kane ka jingwan ka Committee ka dei kaba la leh halor ka jingkhot sngewbha u Myntri Rangbah Conrad K Sangma uba la kyrpad ia ka Committee ban sngap nyngkong eh ia ka jingsngewkhia ki nongialam Niam ha ka Jylla.
U Jaiswal ula ong ba ka Committee kala ioh pdiang bad sngap ia ki jingai jingmut na ki seng bapher bapher ha Meghalaya halor ka jingtyrwa jong ka FCRA Amendment. Kila pan shuh shuh ia ka jingpynshai na ki kynhun ba iashimbynta, bad aipor ia ki 15 sngi ba kin aiti ia ki jubab.
U iathuh ba hadien ka jingioh pdiang ia ki jubab, ka Committee kan sa pynkhreh ia ki jingai jingmut hashuwa ban wanrah biang ia ka Bill na ka bynta ka jingmynjur, da ka jingthmu ban pynthikna ba kane ka Ain kan shakri ia ka bha ka miat jong baroh ki kynhun ba don bynta.
Palat 30 tylli ki kynhun kila iashimbynta ha kane ka jingiasyllok ha Shilllong, kynthup ki nongmihkhmat na ki Jylla bapher bapher ka thain Shatei Lam Mihngi.
Napdeng kiba mihkhmat ia ki sengniam na Meghalaya ki dei u Fr Richard Majaw na ka bynta ka Balang Catholic, Rev Pastor HL Marshing (PCI) bad Dr DRL Nonglait na ka bynta ka Balang Presbyterian, Rev SK Syiemlieh na ka bynta ka Church of God bad Tony Marak na ka bynta ka Balang Baptist.
