Shillong Nohprah 13: U Myntri Rangbah ka jylla u Conrad K Sangma kum u Kongsan ryngkat bad u Myntri ka Tnad Sports and Youth Affairs u Bah Shakliar Warjri kum u symbud kongsan, hynne ka sngi Balang kila plie ia ka Nongkseh Indoor Stadium.
Ha kane ka jingplie ia ka Indoor Stadium kaba la tei ha ka jinglut kaba T. 1.41 Klur, la iadonlang ka Myntri ka koit ka khiah ka Kong Ampareen Lyngdoh, u MLA barim ka Mylliem uba long ruh u Nongaibuit jongu Myntri Rangbah ka jylla u Bah Hamletson Dohling, ka Director jong ka Sports and Youth Affairs Kong Isawanda Laloo, u Rangbah shnong ka Raid Sawkur Nongkseh Bah AL Thangkhiew, u President ka Nongkseh Sports, Social and Cultural Club bah Daniel M Thangkhiew bad kiwei kiwei.
U Myntri Rangbah ula ong, ba u dap da ka jingsngewtynnad ban ioh plie ia kane ka Indoor Stadium khamtam haba ha ki 2 ne 3 snem mynshwa ula wan bad u Bah Hamletson Dohling ban buh ia u mawnongrim ban tei ia kane ka Indoor Stadium.
“Ka sorkar kam tei tang ia ka Indoor Stadium hynrei kadei na ka bynta ki samla kaba ka sorkar ka lah ban ai khnang ba ki samla kin ioh ban pyndonkam khamtam ban lait ha ka jingiaid ka lynti ka bym dei. Kum ka sorkar ngi pyrshang katba lah ban pynbiang ia ki jingdonkam ban iarap ban iaid ha ka lynti ha kaba dei bad kane ka jingtei kan long lehnohei lada ym lah pat ban pyndonkam ia ka ha ka lynti kaba dei. Nga kwah ban iohi ba dei ban pynlong ia ki prokram ki bapher ha kane ka jaka kum ki jingaihikai ia ki samla ha kaba iadei ban ioh ia ki skhim sorkar, iohkam iohjam bad kumta ter ter” ong u Myntri Rangbah.
“Nga ngeit skhem ba ha ki sngi ban wan ba kane ka shnong kan trei borbah ban wanrah ia ka jingkylla da kaba iatreilang bad ka sorkar na ka bynta ban btin lynti ia ki samla kaban long ruh kum ka nuksa ia kiwei pat bad na ka liang la jong nga, ngan ai ia ka jingkyrshan” ong u Conrad Sangma.
Nongkseh Indoor Stadium is the first-ever indoor stadium in Mylliem Constituency and I am glad that two more are coming up in the constituency. Must appreciate the efforts of former MLA, Sh. @HamDohling in achieving this.
The Development of such infrastructure for youth and… pic.twitter.com/zQOYkNLafO
— Conrad K Sangma (@SangmaConrad) December 13, 2023
U Myntri Sorkar ula ong ba ka sorkar, man la snem la pynlut 7000 haduh 8000 klur tam ha man la ki jaka ban pynbiang ia ki jingdonkam bad ha kane 5 snem ka long T.40,000 Klur, hynrei hashwa u snem 2018 ka jingpynlut ka long tang T.2500 ne 3000 klur.
Ula ong, ngi don hangne ban shakri ia ki paidbah ka jylla bad ym dei tang u Chief Minister jong ka NPP hynrei u Chief Minister jong ka jylla Meghalaya baroh kawei bad ban pynbiang ia ki jingdonkam kumjuh ia baroh.
U Myntri Rangbah ula sam ruh ia ka jingai jingiarap shimet nalade, sha ki katto katne ki nongshong shnong ka Nongkseh kiba don hapdeng ka shitom ka shipa.
U Myntri Rangbah ula pynbna ban bhah T. 2.1 klur ban shna iaka Stadium bad ka madan ialehkai ha Nongkseh bad ban shna ha kaban kyntiew noh ia ka Sub Center sha ka CHC.
Glad to announce that we will be sanctioning ₹2.1 Crore for the development of a stadium and football ground in Nongkseh. Inspected the ground today after inaugurating the Nongkseh Indoor Stadium. @ianuragthakur pic.twitter.com/abGT9EsUWN
— Conrad K Sangma (@SangmaConrad) December 13, 2023
U Myntri Rangbah ula kular ba yn wan ban plie ruh ia ka Water Supply Scheme kaba la mang T.15 klur na ka bynta ban pynpoi ia ka umbam umdih ia ki paidbah ka shnong Nongkseh bad yn sa shimkhia ruh ia kiwei kiwei ki jingdawa ruh.
U Bah Shakliar Warjri ula ong ba ha ki 9 bnai kiba la dep, ula leit ha kylleng ki bynta jong ka jylla, la shem ba ki samla bad ki paidbah ha ka jylla bun ki ieid ia ka football bad ki don ia ka sap ka phong bad ka sorkar ka don ia ka jingkitkhlieh ban kyntiew bad ban pynbiang ia ki jingdonkam ha ka kam ialehkai.
“Tang hapoh 9 bnai ngi la ai bun tylli ki Stadium ha kylleng ka jylla mynshwa ka tnad Sports kam don eiei hynrei mynta ka long kaba kongsan bha bad ki ophisar kila trei shitom ban kyntiew ia ka kam ialehkai.Ngi la ai 25 tylli ki Artificial Turf, Indoor Stadium bad ki Badminton Court na ka bynta ka jingmyntoi ki samla namar ngi angnud ba kin kiew ha ka kam ialehkai. Ngi sngewthuh ia ka jingeh ki khun samla ki jong ngi na kata ka daw ngi trei shitom” ong u Bah Shakliar.
Ula ong, ba kane ka jingplie ia kane ka Indoor Stadium ka long kum ka jingai sngewbha krismas ia ka shnong Nongkseh.
U Bah Hamletson ula ong, ba watla ka Mylliem Costituency kadei kaba jan bha bad ka nongbah Shillong hynrei kam don wat tang kawei ka Indoor Stadium ruh bad kane ka jingplie ia ka Indoor Stadium mynta ka sngi kadei kaba nyngkongeh ha ka Constituency.
Ula pynbna ruh ba shen yn sa plie noh ia ka Indoor Stadium ha Lummawbah bad ha Lawsohtun.
Ula ong, ba kum u MLA ula trei shitom ban wanrah ia ki skhim bad project kiba palat ia ka 100 klur bad kane baroh kadei namar ka jingkyrshan jong u Myntri Rangbah ka jylla u Conrad K Sangma.
