Shillong, Nohprah 06: Ka kynhun ialehkai Shillong Lajong FC kala nang bteng ia ka lynti ba khlem pat shah rem haduh phra sien lynter da ka jingjop biang ia ka Churchill Brothers na Goa, da 2-0 kol ha madan SSA Stadium, Polo, hynne ka sngi Balang.
Ka jingiakhun kala shongshit shuwa ban put pynwai ia ka kylla step, ha kaba u Laiwang Bohham ula ioh ban thep ia ka kol ha ka minit ba 45 ban pynlong ia ka Shillong Lajong ba kan tam shakhmat.
Haba wanphai ha ka kylla miet, ka kynhun kala ioh ban thep biang ia ka kol kaba ar ha ka minit ba 51 lyngba u Renan Paulino, kaba la wan lyngba ka jingshut penalty.
Kane ka jingjop kala pynkiew ia ka Shillong Lajong sha ka kyrdan ba lai ha ka jingkamai point hapoh ka I-League Table,da ka jingioh haduh 16 point kaba iaryngkat bad ka Sreenidi Deccan FC kaba don ha ka kyrdan kaba ar, kaba shu tam tang ha ka jingiapher ha ka jingiohthep kol.
Ka Shillong Lajong kan iakynduh mynta sa ia ka Aizawl FC ha ka 10 tarik Nohprah ha ka jingiakhun ka ban long ha madan SSA Stadium, Polo, Shillong.
