Shillong, Naiwieng 15: Kum shi bynta na ka jingiakhih jong baroh ki Nongtrei ASHA hapoh ka Jylla, ki ASHA ka East Jaintia Hills District, hynne ka sngi Balang, kila pynlong ia ka rally ha Khliehriat, East Jaintia Hills.
Ia kane ka jingiakhih ha East Jaintia Hills la ialam daka President jong ka East Jaiñtia ASHA Association Khliehriat Unit ka Kong Pretty Jyrwa.
Haba kren ha kane ka sngi ka Kong Pretty kala buh jingkylli iaka Myntri ka tnat ka koit ka khiah ka Kong Ampareen Lyngdoh halor ka jingkam ba ki ASHA ki ioh T 5000 namar baroh ki katta ki ASHA ki ioh tang T. 2000 man u bnai.
Ka Kong Pretty kala pynpaw ba ki ASHA ki don iala ki khun bad ki hap ban bah lang iala ki khun haba ki leit trei watla ka jingsiew kaba ki ioh kadei kaba rit tam kaba buh jingeh iaki ban pyndap pynbiang hala ki ïing ki sem.
Ia kane ka jingiakhih la sdang naduh Byndihati bad la iaid lyngba ka ophis treikam Deputy Commissioner (DC) ka bad ka ophis District Medical and Health Officer’s Office bad la pynkut ha SBI Khliehriat Branch.
Lah ban kdew haka 14 tarik mynta u bnai, ki nongtrei ASHA jong ka West Jaintia Hills District Asha Association (WJHDSA) kila pynlong ka jingiakhih daka ba iaid paidbah na Tympang Club lyngba ka Iawmusiang sha Daimasi ha ryngkat ki Placard ban kynthoh iaka sorkar MDA.
