Guwahati, Naiwieng 15: Ka National Human Rights Commission (NHRC) kan sa shong bishar ia palat 40 tylli ki case ba iuhroit ia ka hok longbriew hapoh ka thain Shatei Lam Mihngi ha ka Camp ba arsngi, ka ban sdang lashai ka sngi Palei ha Guwahati.
Kat kum ki heh Sorkar, ka Commission kan pynlong ia ka jingialang bad u Chief Secretary, Director General of Police bad ki Heh Ophisar jong ki phra tylli ki Jylla ka thain Shatei Lam Mihngi ban shongbishar kam halor ki sienjam bala shim halor ki jingbthah bad ki jingai jingmut bad ban iada ia ka hok longbriew jong baroh ki nongshongshnong hala ki jong ki Jylla.
Ka Commission ba kynthup ia u Chairperson Justice Arun Mishra, Dkhot Dr Dnyaneshwar M. Mulay bad Rajiv Jain lem bad u Secretary General Bharat Lal bala synran ruh da u Registrar (Law) Surajit Dey, kin wan ban iashimbynta ha kane ka jingialang bad ka camp ban tian bishar ia ki mukotduma.
Ka Commission kan pynsngewthuh ruh ia ki ‘Local Self Government’ halor ki mat bapher bapher jong ka hok longbriew bad kan pynlong ia ka National Conference halor ka mat pdeng ‘Advancing Human Rights through Local Self Governments’ ha ka sngi palei.
