Nongpoh, Naitung 20: Ka Hynniewtrep National Youth Front (HNYF) Northern Region, ka la Byrngem ban khang khyrdep noh ia ka Ophis Jong u Sub Divisional Officer ka Tnad MeECL ha Nongpoh, namar ka jing pynlip bording khari khari ha Ri-Bhoi kaba la kthah jur ia kiba bun ki shnong khamtam ha District headquarter- Nongpoh.
Kane ka jingbyrngem kala mih hadien ba ki nongialam ka HNYF, Northern Region ryngkat bad ka 20 Mile bad Umling Circle kila iakynduh ia u SDO bad Ophisar ka MeECL ha Nongpoh ban pan jingshai halor ka jingpynlip bording khari khari ha ka District, ia kaba kine ki Ophisar kim lah satia ban batai.
Ka kynhun jong ka HNYF ba la ialam da u Assistant Secretary, Donroi Kshiar, u Shiningstar Suting President Arphew-mer circle kila iathuh ba ka seng kala ioh pdiang man ka por ia ka jingujor halor ka jingpynlip bording khari khari bad jingioh duna bording ha ka District khamtam ha Nongpoh bad ki shnong ba marjan kynthup ka thain 20 mile.
“Dei namar kane ka daw ba ngi la wan iakynduh ia kine ki heh Ophisar ban pan jingshai” kila ong.
U Bah Donroi Ksiar ula ong ba ka jingpynlip bording ka dei kaba la leh ruh khlem ka jingai jingtip lypa ne pynbna bad ia ka daw hi lah ban tip tang ka Tnad hynrei ka jingeh pat kala wan lynshop ia ki paidbah nongshongshnong ka District kiba hap ban siew beit ia ka bai bording watla kim ioh pyn donkam thikna ia ka bording.
Halor kane, Ka HNYF ka la dawa ia ka Tnad MeECL bad ia u Myntri kam Bording ka Jylla ba kin shimkhia mardor ha ka ban pynbeit ia kane ka kam lem kumta kan pynbor ia ka seng ban shim ia ka sienjam ba tyngeh lane khang khyrdep noh ia ka ophis u SDO ka MeECL ha Nongpoh.
