Shillong, Naitung 19: U Acting President ka Peoples Democratic Front (PDF) Bah Banteidor Lyngdoh ula ong ba kan long kum ka “jingnohiap hi dalade ha ka kam sain pyrthei” (political suicide) ia kino kino ki MLA ka Party kiba thmu ban kynthih diengkper sha kiwei pat ki seng sain pyrthei hashuwa ka elekshon MLA 2023 ban long ha Jylla.
Kane ka jingkren jong u kala mih halor ki khubor hamsaia ba ki lai ngut napdeng ki 4 ngut ki MLA ka PDF kata u Bah Hamletson Dohlong (Mylliem), Jason S Mawlong (Umsning) bad Gavin Miquel Mylliem (Sohra)-kila rai ban iakhun noh na kiwei pat ki seng sain pyrthei ha ka elekshon ban wan.
U Bah Banteidor uba dei u Myntri Sorkar, ula ong ba ki khubor hamsaia kila don hynrei kam pat long shai satia la kine ki MLA kin mih noh ne em na ka PDF. Ula pynkynmaw ba baroh 4 ngut ki MLA ki dei kiba dang shu jop ha ka sien ba nyngkong eh ha ka elekshon MLA 2018 na ka ticket jong ka PDF.
“Hynrei, lada kim sngewnguh (ia ka PDF), ka shong ha ki hynrei haba peit ia ka jinglong jingman ka sain pyrthei ha ka Jylla, nga sheptieng ba lada phet sha kiwei ki Party kan long kum ka jingnohiap hi dalade ha ka kam sain pyrthei” ula maham.
Une u Nongialam ula ong ba kam long kaba suk ban pynsngewthuh ia ki paidbah namar kila ai ia ka vote jong ki sha kine ki saw ngut ki MLA da kaba nion ha ka shap jong u mombiti.
“Lada phi ong ba ngi donkam ban kylliang party ne kylla ia ka shap, nga sheptieng ba ioh ka ktah pynban bad ka long kum ka jingnohiap hi dalade ha ka kam sain pyrthei bad phin sa babe kylla” ong u Bah Banteidor haba pynpaw baka PDF kala pyrshang ban iakren ia ki MLA halor kane ka kam.
