Shillong, Naitung 19: U Chief Executive Officer jongka Shillong Municipal Board (SMB) u la pyntip sha baroh ki nongshong shnong hapoh u pud u sam jong ka SMB, ba ka sorkar jylla katkum ka Notification on Plastic Waste Management (Amendment) Rules, 2021, kala khang pyrshah / mana ban pyndonkam/pynlang ne die iaki plastic kiba don iaka jingstang ym duna iaka 40 micron.
Une u heh Ophisar ula pyntip ba ki mar kiba la khang ban die ki kynthup ia ki Ear Buds kiba don ryngkat bad ki plastic stick, ki plastic sticks kiba teh ha ki balloon, ki lama plastic, candy stick, ice-cream stick, polystyrene (thermocol) naka bynta ban leh decoration, pliang, pela, klat, proh, shamoit, tari, straw, trays, ki jingsong ia ki jingbam thiang, paket sikret, plastic lane PVC banners ba hapoh ka 100 micron.
Katei ka kyndon kan ym treikam ia ki tiar ki tar kiba la shna lyngba ki Compostable Plastic.
Lada lap ia kino kino kiba lum bad die ia ki mar kin shah pynshitom bad daiñ kuna bad yn kurup ruh ia ki mar ki mata.
