Shillong Nailur 21: Katba ka jingpynkhreh ia ka Monolith Festival ka dang iaid shakhmat, ka Khasi Hills Autonomous District Council (KHADC), kala pynbna ba ia ka jinglut jingsep yn bei da ka sorkar jylla lyngba ka Tnad Tourism.
Ia ka Monolith Festival la buh tarik ban pynlong haka naduh ka 4 – 9 tarik u Nohprah ha Heritage Village kaba don ha Mawphlang, East Khasi Hills.
Haba iakren bad ki nongpathai khubor u Deputy Chief Executive Member ka KHADC u Bah PN Syiem ula ong ba ka jingpynkhreh ia ka Monolith Festival ka dang iaid shakhmat bad ia baroh ki jinglut jingsep yn bei da ka sorkar jylla lyngba ka tnad Tourism. Ka jingthmu jong kane ka long ban kyntiew iaka kam jngohkai haka jylla.
U Bah Syiem ula pynpaw ba ka sorkar ia mynta ka dang khein dang diah ia ka jinglut jingsep ban pynlong ia katei ka Festival, hynrei ka Council kala dep ban bhah ₹10 lak na ka bynta katei ka tamasa.
Ka KHADC ha ki snem kiba la leit kala pynlong arsien ia katei ka Monolith Festival ha u snem 2011 bad 2016.
Watla kala don ka jingpyrshang jong ki Executive Committee jongka Council ban pynkhie im biang ia katei ka tamasa, hynrei kim shym la lah ban pynurlong.
Hynrei mynta u snem, yn pynlong biang iaka Monolith Festival ha kaba la khmih lynti ba kan long kaba heh bad kaba kynsai ban ia ka tamasa kaba la pynlong mynshwa.
