Shillong Nailur 21: Ka Khasi Hills Autonomous District Council (KHADC) ha ka sngi Palei kala pynbna ba kan pynkylla iaka Administration of Elaka Act of 1991 ha kaba yn pynrung ia ki kyndon kiba thymmai ki ban pynkup bor ia ki Dorbar Shnong ban thaw iaki Committee ba khmih bniah ia ki kam sniew kiba jia hapoh jong ka shnong ka thaw.
Ia ka Administration of Elaka (Amendment) Bill 2023 yn rah haka dorbar jong ka KHADC kaban sdang ha ka 22 haduh 25 tarik u Nailur.
U Deputy Chief Executive Member ka KHADC Bah Pynshngain N Syiem, ula ong, ba ha katei ka jingpynkylla yn wanrah ia ka Social Vigilant Committee ha man la ki Shnong, kaban shah ia ki dkhot jong ka Committee na baroh ki liang kynthup ia ki samla bad ki longkmie.
Ula ong ba ka kamram jong ka committee ka long ban pynthikna ha ka ban khmih bniah ia ki kot ki sla bad ia ki rekod jong ki briew kiba nabar ka jylla kiba wan shongwai hapoh ka shnong ka thaw, da ka jingthmu ban tehlakam ia kino kino ki kam sniew ne ki jingleh ki bym dei hapoh jong ka shnong.
Ula ong, ba ka committee kan iatrei ryngkat lang bad ba ka tnad Pulit jong ka jylla.
