Shah hiar thma ka jaidbynriew ha ka khaii ka pateng
Nongpoh, Nailur 15: U Chief Executive Member ka Khasi Hills Autonomous District Council Bah Pyniaid Sing Syiem, hynne ka sngi Thohdieng, ula hiar khang khyrdep ia jan kot spah tylli ki dukan jong ki bar Jylla ki bym don Trading Licence hapoh ka them Ri-Bhoi District.
Ia une u Khliehduh ka KHADC la synran da ki Executive Member, ki Ophisar bad ki Pulit ka Tnad Enforcement ha ka jingiadon ryngkat ki kynhun Sengbhalang.
Kane ka jinghiar khynra Trading Licence u CEM kala wanjia hadien ki jingujor na ka por sha ka por jong ki kynhun bapher bapher ba ki bar Jylla kila seng dukan beain ban leh ia ki kam khaii pateng hapoh ka District khlem da iaid kat kum ki ain jong ka Council bad kiwei kiwei ki jingioh jingbit.
Ha kane ka jingkhynra, u CEM ula lap ba ki don bun tylli ki dukan ba khlem Traading Licence kiba don naduh Byrnihat shaduh sha Khanapara kynthup ia 46 tylli kiba leh bym patiaw ia ka show cause notice bala phah kham hashuwa da ka Council namar ka jingbym don ia ka Trading Licence.
Lah ban kdew hangne, ki bor ka KHADC na ka tnad Enforcement ha ki bnai kiba la leit noh ki la hiar ban khynra trading lisen ia ki dukan ki bar jylla ha ki thain khappud ka Ri-Bhoi district bad ha katei ka jingkhynra la lap haduh 46 tylli ki dukan ha ka thain Byrnihat, ki bym don satia ia ka trading lisen.
Ka KHADC kala ai show cause notice ia kine ki dukan ba kin pynbiang ia ki kot ki sla ba donkam hynrei ha ka jingkhynra biang hynne ka sngi,la shem ba kine ki dukan kim shym la patiaw eiei ruh em ia kane ka jingbthah ka KHADC.
Ha kane ka jingkhynra u CEM la lap shuh shuh ia kiwei pat ki dukan ba la pyniaid da ki bar jylla ba kim don ia ka trading lisen bad la khang khyrdep syndon ia ki da kaba bthah ba ki dei ban leh ia ka trading lisen lym kumta kin shah khang shi rta.
Haba kren bad ki Nongthoh Khubor, u Bah Pyniaid Sing Syiem u la iathuh, ba ka EC jong ka KHADC kala shimkhia ia ki jingujor halor ka jingkynrei ki bar jylla ban wan leh ia ki kam business bapher bapher khlem da burom ne pyrwa ia ki ia ka United Khasi Hills Jaintia Hills Trading by Non Tribal Regulation Act. U iathuh ba ha ka jingkhynra, ula lap dalade ia ka jingshisha.
U CEM ula ai khublei ruh ia ki kynhun sengbhalang ba kynthup ia ka KSU bad HNYF lem bad ka seng kynthei Border Welfare Committee, kiba la wan ban synranlang ia kane ka jingkhynra Trading Licence jong ka KHADC.
“Ka jaidbynriew Khasi ka la shah hiar thma ha ka liang ka khaii ka pateng ha ki jaidbynriew ki bym dei ki khasi. Kane ka EC ba mynta kan nym ailad satia ia kane bad kan ai mynsiem ia ki samla khasi ba kin sengkam lade bad ban ieng ha la ki jong ki kjat khamtam hapoh ki shnong ki thain ba don ha khappud khnang ba yn lah ban rad dyngkhong ia kine ki jaidbynriew kiba nabar ban ioh bsuh khlieh ha ki kam khaii ka pateng” ula ong.
U CEM u pyntip ba kane ka jingkhynra Trading Licence jong ka KHADC kan dang iai bteng hapoh u pud u sam jong ka Council ban pynthikna ba ki bar Jylla kin nym ioh sengkam laitluid.
Pule lang ia kane: Kwah ka HANM ban pyrshah ki MP ka Jylla ha Parliament ban pynkylla iaka ‘India’ sha ka ‘Bharat’
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
