Shillong, Naitung 24 : Ka kynhun ki riew runar, ha ka sngi Nyngkong, kila leit thombor ia ka jaka leh niam ki Hindu bala tip kum ka Shiv Temple kaba don ha Mahadev Khola bad shoh ia ki riewngeit katba ki dang wan leh niam.
Kane ka jingjia kala jia ha ka por 12 baje eiei bad ki Pulit mynta ki dang tohkit ia kane ka jingjia bad dang shong bishar ia ki video bala ring lyngba ki CCTV ban lah pynithuh ia kine ki runar.
Namar ka jinglehniam Sawan jong ka sngi Nyngkong kaba lai, kila don bun ki riewngeit kiba wan sha ka Temple hynrei kynsan kynsan, ki riew runar kila wan rung ha kane ka Temple bad shu shoh naphang ia ki riew ngeit kynthup ia ki nong shongdukan hajan kane ka jaka mane blei.
La kynnoh ruh ba kine ki runar kila knieh bad shoh ia ki riew ngeit kynthei kiba wan ban tyrwa um sha u Blei ha kane ka temple ha kaba bun ngut kila mynsaw.
La ong ba hadien kane ka kam thombor, kine ki runar kila phet krad na kane ka jaka bad ki bor pyniaid kane ka jaka mane Blei kila pyntip mar mar sha ki Pulit ba kin wan tohkit.
Ki bor pyniaid ka Temple kila pyntip ruh ba kum kine ki kam thombor ha kane ka jaka mane Blei ka dei kaba la jia la bun sien.
Ki Pulit kila register case halor kane ka jingjia bad ka jingtohkit kala iaid shakhmat ban ithuh ia ki briew ba donkti bad ban leit kem ruh ia ki.
Hynrei u Superintendent of Police u pyntip ba nyngkong kane ka jingjia kala sdang na uwei u briew uba la wan sha Mahadevkhola bad pan ia ka jingdih Amul Cool na kawei ka dukan.
Une u briew ula pan ia kane ka jingdih da kaba ong ba un sa siew hadien hynrei namar ka jingkyntait, une u briew ula kawang da u snepkor ia ka trai ha kaba la mih u khun ban tuklar bad poi sha ka jingiashoh.
U iathuh ba hadien shiteng kynta, une u briew ula wan biang bad saw ngut kiwei pat ki briew ban thombor ia kane ka kynthei bad ia u Khun bad kila tuh ruh ia ka pisa n aka dukan jong ka shuwa ba kin phet krad.
Ki Pulit ka Jhalupara haduh ioh jingtip ia kane, kila leit mareh wut wut ban pynlong ia ka jingtohkit. Ki Pulit kila register case ia kane ka jingjia ha Lumdiengjri Police Station.
Pule lang ia kane: Shah kloh ka Mobile Phone u DIG ka Assam katba dang iaid kai step
