Imphal, Naitung 24 : U Kurim jong kawei na ki Kynthei ba shah pyniaid lyngkhuid bad shah jrongkti ha ka kynhun ki shynrang ha Manipur, uba dei ruh u shipai ba iakhun ia ka thma Kargil, ula ong “Nga la iakhun thma ban iada iala ka Ri hynrei ngam shym lah ban iada iala ka Kurim na ka jingshah pynjah burom khait”.
Haba iakren bad ki nongthoh khubor ha Imphal, une u shipai ula buh dak jingkylli halor ka bynta jong ki Pulit ka Manipur, halor ka jingkynnoh ba ka kurim jong u lem bad kiwei, kila shah patan ha ki paidbhur na ka kali ki Pulit bad ki Pulit ruh kim shym la leh eiei.
Une u Kurim u dei uba shakri kum u Subedar jong ka Assam Regiment, uba don bynta ha ka jingiakhun ia ka thma Kargil.
“Nga la iakhun na ka bynta ka Ri ha ka thma Kargil bad nga la leit ruh sha Srilanka kum shibynta jong ka Indian Peacekeeping Force. Nga la iada iala ka Ri hynrei ba nga sngewsih pat ba hadien ba nga la shongthait, ngam shym la lah ban iada iala ka Iing ka sem, ka Kurim bad ia ki para Nongshongshong. Nga da sngewsih shaba palat” ula ong.
“Ki Pulit ki iadonlang hynrei kim shym la leh eiei. Nga kwah ba baroh kito ki briew kiba thang ia ka Iing bad pynjah burom ia ki Kynthei ki dei ban ioh ia ka jingpynsajia ba tasam tam” ula ong.
Ula ong “Hangne ka Jaidbynriew bun paid ki ju thombor beit ia ki jaidbynriew rit paid kum na ngi. Ngim lah shuh ban iasah lang bad kiwei pat ki Jaidbynriew. Ka Sorkar mynta ka dei ban wad noh ia ka jingpynbeit kaba neh shirta”.
Pule ruh: Yn pan kaiphod ka Myntri ba khlad u Samla ba aksiden kali ha NEIGRIHMS
