Nongstoin, Naitung 12 : Ka jingpynpra karkhana coke ba be-ain da ki bor District ka West Khasi Hills ha thain Shallang, kala kiew mynta sha ka 7 tylli bad ki Pulit kila kem haduh 6 ngut ki trai kat haduh ba thoh ia ka khubor.
Hynne ka sngi Balang, ki Bor Pyniaid District kila pynpra biang sa lai tylli ki karkhana ba beain da kaba pynbthei da u bomb ia ki otoskhana (chimney) haduh da pra hi phum. Kine ki dei kiba don ha ka thain Kyllonmathei, Shallang.
Ki Heh Pulit ki pyntip ruh ba ka jingkem ia ki trai jong ki karkhana coke ba be-ain kala kiew sha ka 6 ngut da ka jingiohkem biang sa uwei u trai.
U Deputy Commissioner ka West Khasi Hills Bah Garod LSN Dykes, ula pynjari da ka kyndon 144 CrPC ba mana ia ki riew paidbah ba kin iatur shajan ki karkhana coke ba be-ain namar ba dang iaid ka jingpynpra ia ki atoskhana (chimney) jong ki karkhana be-ain.
Ia kane ka hukum la pynmih naduh ka 11 tarik Naitung bad la pyntreikam mar dor ha ka thain.
Kat kum kane ka hukum, u Deputy Commissioner ula bthah ban pynpra lut ploin ia ki karkhana coke ba beain kat kum ka Order Memo No. NDG 304/2020/Pt11/79-A dt. 02/02/2023.
La ong ruh ba ka Sorkar Meghalaya kala ai jingmynjur ban pynpra ia ki atoskhana jong ki karkhana coke beain ha ka District kat kum ka shithi FOR 2/202/302 dt.4/7/2023.
Halor kane, la ai jingbthah ban pynpra ia ki karkhana coke ba beain hapoh ka District kaba sdang naduh ka 7 tarik Naitung, 2023.
Pule lang ia kane: Kyrpad ki Nongshong dukan bam ia ka DC ban pynjynsur ia ka 144 CrPC
