Shillong, Naitung 12 : Shisngi hadien ba ka Bor District kala khang ban plie ia ki dukan, dukan bam bad kiwei kiwei ki dukan ha Nongbah Shillong hadien ka 10 baje, ki nongshong dukan ba die jingbam ha ka por miet, kila kyrpad ia ka Deputy Commissioner ba kan pynjynsur ia ka por sha ka 12 baje shiteng miet.
“Ka kham shngain pynban namar ngi don hangne bad plie dukan ha ka por mynmiet” ong iwei na ki nongshong dukan bam ha Khyndailad.
“Ngi kyrpad ia ka DC ba kan shah ia ngi ban plie ia ki dukan haduh ka por 12 baje shiteng miet. Ban khang noh 10 baje mynmiet kan dei ka jingduhnong kaba khraw ia ngi” ila ong.
Hynrei ka Deputy Commissioner RM Kurbah kala pyntip ba ka rai ban pyrrkhing ia ka jingplie ia ki dukan bam, ki dukan bad kiwei kiwei ki dukan hadien ka 10 baje mynmiet ka dei kaba la shim da ka jingiamynjur lang, hadien ka jingiohi ia ka jingmih kiba bun ki huri hura hapoh ka Nongbah.
Ka hukum ka dei kaba la pynmih namar ka jingjia iaumsnam bapher bapher kila la jia ha kylleng ki jaka ka Nongbah Shillong, kaba la ktah ruh ia ka shongsuk shongsain khamtam ha ka por mynmiet. Kala maham ruh ba kiba pynkhein ia ka hukum kin ngat ha ki jingpynsajia kat kum ka kyndon 188 IPC.
Lah ban kdew, ha ka taiew bala lah, ki runar kila wiang ding ia lai tylli ki kali ba pynieng ha phyllaw ka Laitumkhrah Police Station, kaba la jia hadien ka jingiasoh iadat hapdeng ki ar kynhun mamla.
Ki Pulit kila kem ia 5 ngut ki briew kiba donkti ha kine ki kam.
Pule lang ia kane: Pynjari kyndon 144 CrPC u DC ba mana ban iatur shajan ki karkhana coke ba be-ain
