Imphal, Naitung 03 : Ki Volunteer ka jaidbynriew Kuki ha ka sngi U Blei kila pyllait noh ia ki san ngut ki samla ka Jaidbynriew Meitei ba ki ioh kem kum ka jingpyrshang ban wanrah pat ia ka jingsuk ha Manipur bad ban phah ruh ia ka khubor ka jingiasuk.
Kat kum ka jingpyntip ki Volunteer ka jaidbynriew Kuki ha Gwaltabi, san ngut ki samla Meitei kila shah bat ha ka janmiet sngi Saitjain ha ka por 2 baje hapoh ka Saikul Police Station, Saikul Sub Division kaba hap hapoh ka Kangpokpi District.
Kine ki san ngut ki samla ki dei ki mechanic bad katto katne ngut na ki la suba jur ba ki don ka jingiadei bad ka kynhun Arambai Tenggol.
Haba iakren bad ki nongthoh khubor, ki volunteer kila iathuh ba kila tohkit ia kine ki samla bad kila phla ia shibun ki jingtip ha ka jingtohkit bad ia kine ki jingphla baroh lah ring ruh da ka video kum ka sakhi.
Kat kum ka jingphla kine ki samla, la batai ba u nongsuhbuit ha lyndet kane ka thma iapher jaidbynriew u dei u Myntri Rangbah ka Jylla N Biren Singh bad bun ki paidbah jong ka jaidbynriew Meitei ki dei kiba pyrshah ia ki kam iaumsnam.
Haba sot ia kaei kaba phla kine ki san ngut, ki volunteer kila ong ba u N Biren Singh ula pheil ha ka jingtreikam kum u Myntri Rangbah bad ula shah rem ruh ha kane ka thma.
Ki volunteer ki ong ba ia kane ka jingtip la sei paidbah bad haba tip ia ka jingshisha ba katto katne ki dei kiba don jingiadei bad ka kynhun kiengatiar ki Meitei, ka Arambai Tenggol, kumta la pyllait noh ia ki khlem kano kano ka jingpyn mynsaw, ia kaba la leh da ka jingthmu ban phah ia ka khubpr sha ki Meitei ba kin pynkut noh ia ka jingpyntriem ka bym kut shuh pyrshah ia ki jaidbynriew Kuki.
Nalor kane, ki san ngut ki samla Meitei kila pynpaw ia ka jingsngewnguh ia ki volunteer ki Kuki bad ia ka jaidbynriew Kuki halor kane ka jingsngewlem jong ki.
Pule lang ia kane: Jingbatai : Kaei ka Behdeinkhlam? Tip ia ka Tarik, shuti bad bun kiwei kiwei
