Shillong, Jylliew 23 : Ka Kunhun ki riew shemphang ka Nagaland kila wan ban jngoh ia ka Khasi Hills Autonomous District Council (KHADC) ban peit bad shemphang halor ka bynta jong ka Council ban iada ia ka hok ki paidriewlum trai ri bad ia ka khyndew ka shyiap jong ki.
Kane ka kynhun ba lai ngut na Nagaland kala iakynduh bad iakren iakhana ruh bad ki dkhot jong ka Executive Committee ka KHADC. U Executive Member Bah Teiborlang Pathaw ula ialam ruh ia ka kynhun ban jngoh ia ka Building ka Council kaba treikam ka Executive, Lagislative bad Judiciary.
Haba iakren bad ki nongthoh khubor, ka Dr Anungla Imdong Phom, kaba dei ka Director ka Directorate of Under Developed Areas (DUDA) ka Sorkar Nagaland ula ong ba kane ka kynhun haba wan rung sha Shillong kala iohi ia ka signboard jong ka KHADC bad kala shonkhmat bad rai ban iuhkjat hapoh ka Council.
“Ngi la ioh jingtip ba kane ka Council ka dei kaba iada ia ka khyndew ka shyiap, ka riti ka dustur jong ki paid riewlum trai ri. Ta ka daw ngi la wan hangne. Kum ki Naga, nga ialade nga dei u riewlum, ngi dei ban iada ia ka jaidbynriew lajong bad ruh ngi dei ban iada ia ka riti ka dustur bad kane ka dei kaba ka KHADC kala leh” kala ong.
Haba pynpaw ba ka KHADC ka dei ka nuksa ia kwei pat ki Jylla ka thain Shatei Lam Mihngi, ka Dr Anungla kala pynpaw ia ka jingkmen ban tip ba ki briew na kylleng ki Jylla kum ka Ladakh kila wan shane ban wad jingtip ia ka rukom treikam jong ka KHADC.
Haba kylli, ka Director kala ong ba ka DUDA ka kwah ban wad jingtip ba bniah halor ka KHADC namar ka Sorkar Pdeng ka don jingthmu ban ai Autonomous District Council ia ki katto katne ki bynta jong ka Nagaland.
“ki Executive Member kila bha palat ban ai ha ngi ia ki kot ia kiba ngi lah ban wad bniah bad kaei kaba bha tam ia ki briew jong ngi, ngin pyrshang ban pyntreikam (ha ka jylla jong ngi)” kala ong.
Pule lang ia kane: Twa ka kynroh ka P A Sangma Stadium ba set ka nala tuid um, ong ka kaiphod ka Sports Council
