Shillong, Jylliew 23: Katkum ka jingkhmih bniah jong ka tnad Engineering Wing jong ka State Sports Council of Meghalaya kala shem ba ka jingkhyllem ka kynroh maw jong ka PA Sangma Football Stadium, P.A. Sangma Sports Complex kadei namar ba kala don ka jingset um jong ki nala namar ka jingpyntrei iaki jingtei bapher ryngkat bad ka jingjur u slap.
Ka Hindustan Steelworks Construction Limited kala phah iaka kaiphod halor katei ka jingjia.
Katkum ka kyrwoh khubor na u Commissioner & Secretary katnad Sports and Youth Affairs ula pyntip ba haka jingkhmih bniah la shem ba kala don ka jingpyntrei ia ki kam ha ka Indoor Hall 1 bad Indoor Hall 2, ryngkat bad ka jingther u lapbah, kala mih ka jingsahkut ha ki nala kaba la pynlong ia ka um ba kan lang ha katei ka stadium bad ban wanrah iaka jingkhyllem iaka kynroh maw.
Kam shym la don pat kano kano ka jingshah ktah jong kiwei pat ki jingtei kiba don ha katei ka jaka.
Ka P.A. Sangma football stadium kadei shi bynta jongka P.A. Sangma Sports Complex, kaba kynthup iaka Football Stadium, kaba la plie ha u Nohprah 2022, ka Indoor Hall 1 kaba kynthup iaka Swimming bad Squash bad ka Indoor Hall 2 kaba kynthup iaka Badminton, Table Tennis bad Basketball.
Kitei ki ar tylli ki Indoor Hall ki dei kiba dang don hapdeng ka jingpyntrei ia ki jingtei bapher bad yn pyndep ia kine ki jingtei ha u Nohprah 2024.
Ban shimkhia mardor ia kane ka jingjia, kumta la weng lut ia ki bynta baroh kiba la pynlong ban sah set sbak ia ki nala bad la sdang ruh ia ki kam ki jam na ka bynta ban maramot ia ka kynroh maw da kaba buh shwa mynta da ki byrni shyiap, ka jingker da ki maw kiba la sop da ki sainar bad kiwei kiwei kiba long ki lad bad ki sienjam kiba la leh ia mynta mardor.
Hadien ba kala sangeh ka jingslap, yn sa sdang noh iaka jingtei kaba pura ia katei ka kynroh maw katkum ka jingdonkam bad katkum ka jingpynwandur.
Nalor kane la shim ruh ia baroh ki sienjam ban pynthikna ba ki paidbah kin ioh ban pyndonkam noh shen ia katei ka football stadium.
Pule lang ia kane: Bthah u DyCM ia ki DC ban buh jingkhein ia ka jingwan ki phetwir na Manipur
