Shillong, Jylliew 21: Ki nongialam jong ka Meghalaya ASHA Workers’ Union hynne ka sngi Balang kila kyrpad iaka sorkar jylla ba kan tuklar lem ha kaban thaw ia ki kyndon aiñ ban iada na ka jingwengkam syndet ia ki ASHA khlem kano kano ka nongrim ne ki daw kiba biang.
Katei ka kynhun kala pynsngew ia katei ha ka Myntri ka tnad ka koit ka khiah ka Dr Ampareen Lyngdoh ha kaba kila ai ruh iaka dorkhas ban pynpaw ia ki jingeh kaba ki ASHA ki shem jingeh ha ka jingaijingshakri ka jong ki kaba man la ka sngi.
Haba iakren bad ki nongthoh khubor ka Nongaibuit jong ka Meghalaya ASHA Workers’ Union ka Kong Sony Kharjana kala ong ba kila pynsngew ha ka Mytri ka koit ka khiah ban kyntiew iaka honorarium ₹2000 shi bnai bad ban pynrung bad pyntreikam ia ki kyndon ban ai jingsumar ei ia ki lyngba ka MHIS ne lyngba kiwei pat ki skhim.
Ha kaba iadei bad ka jingshah wengkam ki ASHA khlem kino kino kid aw kiba biang, ka Kong Kharjana kala ong, ba ki don kip or ba ki ASHA kila shu shah wengkam khlem kano kano ka daw bad kila don ruh ki jingjia ba ki nongtrei ASHA kila shah weng noh na ka kam tang namar ba ki don daw shimet bad ki Rangbah Shnong ha ki thain nongkyndong.
Kala banjur ia ka jingdonkam ban kyntiew noh iaka honorarium jong ki ASHA khnang ba kin lah ban pyndap pynbiang ha kum kane ka por kaba mynta kaba ki marba mmardih kila kiew dor lut.
“Ngim shym la ioh ia kano kano ka jingkular naka Myntri Sorkar hynrei kala pynthikna pat ba kan lum biang iaka jingialang haka 10 tarik u Naitung ban iatai sani halor ki jingeh bad jingjynjar kaba mad da ki ASHA” ong ka Kong Kharjana.
