Shillong, Jylliew 21 : U Myntri Rangbah ka Jylla Conrad K Sangma hynne ka sngi Balang ula pyntip ba ka Sorkar Jylla kala wad khlem shongthait ia ki briew ki bym don ka jingiashah liang, ba kin long ki dkhot jong ka Expert Committee, ban pynthikna ia ka jingbishar ba biang tarajur halor ka Reservation Policy.
Haba iakren bad ki nongthoh khubor, u Myntri Rangbah ula pynpaw iala ka jong ka jingkut jingmut ban thaw ia ka Committee ka ban bat skhem ia ka nongrim ba iasam marbiang.
Ula batai ruh ba ka long kaba kongsan ban sngewthuh ia ka jingkongsan ban don ka jingbishar ka bym iashah liang ia ka Reservation Policy ka Jylla bad ban ioh ia kane, ka Sorkar kala wad khlem shongthait ia ki briew kiba shemphang ha kane ka kam bad kiba lah ban ai shibun ki jingpynshong nongrim.
U Myntri Rangbah ula ban jur ruh ba ka jingthaw ia ka Expert Committee kan ym kut tang ha ki briew kiba dei napoh ka Jylla. Ka Sorkar ka kwah ban kynthup lang ia ki riew shemphang ba na shabar ka Jylla ruh kumjuh, ka ban plie lad ha kaban sngewthuh khambha ia kane ka kam.
Ka mat treikam ba hakhmat eh jong ka Expert Committee ka long ban shong bishar ia ka Reservation Policy bad ban phah ia ki jingai jingmut ia kino kino ki jingpynjanai ne jingpynbeit.
