Shillong, Jymmang 09 : Ka MLA ka NPP na Sutnga-Saipung Kong Santa Mary Shylla hynne ka sngi Ba-ar, kala leit jurip ia ki jingtei ba dang pyntrei mynta jong ki project bapher bapher ba kynthup ia ka Iew Khappud (Border Haat) ha shnong Huroi bad jong ka surok Sonapur-Borghat kaba pyntrei hapoh ka NERDS ba pyniasoh ia ka Shymplong, Borsara, Lejri, Lahalein, Huroi bad shnong Hingaria.
Ia kine ki artylli ki project la bei tyngka da ka Sorkar ha u snem bala lah bad ia u mawnongrim la buh da u Symbud Myntri Rangbah ka Jylla Bah Prestone Tynsong.
Ia ka MLA la synran da ki Ophisar na ka Ophis u Deputy Commissioner ka East Jaintia Hills, District Commerce & Industries Centre, PWD (R) NEC Division Khliehriat, ki contractor ba pyntrei ia ka kam bad u Adviser ka JAC Bah Kynjaimon Amse.
Hadien ka jingjurip, I Kong Santa ila pynpaw ia ka jingsngewhun halor ka jingiaid jong ki kam jong kine ki artylli ki project bad kyrmen ba kine ki project kin sa dep noh hapoh ka por bala buh. Shisien bala pyndep, kan sa iarap bha ia ki paidbah ka thain khamtam ka surok naba ki paidbah ka thain kim pat ju ioh ia ka surok kaba bha.
Ka jingthmu jong kane ka jingjurip ka long ban ai ka jingkular ia ki paid khappud ba ka Sorkar Jylla ka don ryngkat bad ki bad ba kine ki artylli ki project kim dei tang ki buit pynbiej elekshon kumba kynnnoh da ki katto katne ki briew.
Ka MLA kala iakren iakhana ruh bad ki riew rangbah bad ki paidbah haba kular ban ai ka jingiatreilang kat kaba lah bad ruh ban shimkhia ha kaban pyniakren lem ia ka jingeh ba ki iakynduh na ka kam sam bording elektrik, ki mobile tower bad kiwei kiwei bad ka Sorkar Jylla.
Ka kong Santa ka sngewthuh ia ki jingeh jong ki paid khappud haba iadei bad ka surok hynrei namar ba ka jingshna ia ka surok ka dang iaid shaid shaid, katto katne ki jingeh kin iai mih beit.
Hynrei kala kyrpad ia ki paidbah ban long kiba iai shah bad iatreilang bad u contractor na ka bynta ban lah pyndep noh kham kloi ia ka surok haba ong kan shimpor tang katto katne por ban pyndep ia kane ka kam bad hadien kane, baroh ki jingeh kin sa jah noh.
Ka MLA kala bthah ruh ia ka Tnad PWD bad ia u contractor ba kin iarao lem ia ki paidbah ha kaban pynkhuid ia ka surok lada don kano kano ka jingpakhang lynti ha ka por lyiur. Ka MLA kala kyrpad ruh ia ki tnad ba dei khmih ban shong bishar kam man ka por halor ka jingiaid ki jingtrei jong kine ki artylli ki project.
Ka MLA kala iakren ruh bad ki Heh shipai BSF bad ruh ki dkhot ka KSU Huroi Unit. Kala kular ban sa rah iakren bad ki bor ba halor halor ki jingsngewkhia bala pynsngew da ka KSU.
