Shillong, Iaiong 20 : Ki Nongtrei ka Meghalaya Energy Corporation Limited (MeECL) kila byrngem ban pynlong ia ka jingiakhih da kaba shong kyllain mungor lada ki bor khmih kim lah ban pyllait noh ia ka tulop jong u bnai Lber hapoh ka sngi thohdieng.
Ia kane ka rai la shim ha ka jingialang ba kyrkieh jong ka Coordination Committee jong ka Registered MeECL (Employees) Associations and Unions (CCORMAU) ba long hynne ka sngi Palei.
“ Kine ki dei ki rai bala shim da ka jingmynjur lang ba ia ka tulop jong u bnai Lber 2023 dei ban pyllait noh lashai ka sngi ka 21 tarik Iaiong, lem kumta kan pynbor ia ki Nongtrei ban pynlong da ka jingiashong kyllain mungor ha ka sngi ba bud jong ka sngi long trei ha manla ki Ophis treikam” ong u President ka CCORMAU Bah PK Shullet ha ka shithi bala phah sha ka Chairman cum Managing Director ka MeECL Sanjay Goyal.
Ula ong ba ka Committee kala dawa ruh ba ka tulop jong ki bnai ban wan ka dei ia kaban pyllait noh kat kum ka Code on Wages 2019, lem kumta kan don ka jingiashong kyllain myngor ha ka sngi long trei kaba bud.
