Shillong, Iaiong 20: Ka Myntri ka tnat ka koit ka khiah ka Dr. Ampareen Lyngdoh ka badei ruh ka nongaiktien ka sorkar Meghalaya Democratic Alliance (MDA) kala kular ba shen ka sorkar kan sa shim iaka sienjam kaba biang tam haba iadei bad ka Roster System.
Haba kren sha ki lad pathai khubor ka Dr. Ampareen kala ong “Ka sorkar kan sa shim daka sienjam kaba bha tam bad ka sorkar kan pynthikna ba ka sienjam kan dei katkum ki jingtip ba paka bad kaba biang”.
Ka Dr. Ampareen kala kyntu iaki paidbah jong ka jylla bad kumjuh ruh ia kiwei ki sengsain pyrthei ban ailad iaka sorkar ban lum iaki jingtip ba donkam naka bynta ban pyntreikam iaka Roster System khnang ba kane ka jingpyntreikam kan long kaba beit bad kaba biang bad ka bym leh shilliang ia kano kano ka jaitbynriew lane iaki paidbah ka jylla.
Kala kyntu ruh ia kiwei ki sengsain pyrthei ban ai ki jingai jingmut bad kala kular ruh ba ka sorkar kan shim lut iaki jingai jingmut jong baroh hashuwa ban shim iaka rai kumno ban iaid shakhmat haba iadei bad ka Roster System.
Ka Dr. Ampareen kala kyntu ruh iaki paidbah ka jylla ba kim dei ban shah ialam bakla ha kino kino haba iadei bad ka jingiaid lynti bad ka jingpyntreikam iaka bhah thungkam lane ka Reservation Policy.
Kala ong ba ka sorkar ka don jingtip ba kane ka jingdawa sangeh pyntreikam iaka Roster System ka lah ban wanrah ka jingiapher jaitbynriew hapoh ka jylla bad kala kyntu iaki paidbah ba kidei ban shaniah haka sorkar ban shim iaki sienjam kaba bha tam.
“Nga kwah ban kular sha ki paidbah ka jylla ba ka sorkar ka shim khia bad ka leh iaka ba donkam haba iadei bad kane, ka sorkar kala bud ruh iaki katto katne ki hukum ka ïing kashari kumno ban pyntreikam iaka Reservation Policy ka ba myntoi lang ia baroh bad shen ka sorkar kan sa shim iaka sienjam kaba bha tam” la ong ka Dr. Ampareen.
