Shillong, Iaiong 20: Ka Hynniewtrep Integrated Territorial Organisation (HITO), Ri-Bhoi Distict ha ka jingdonlang ka Dorbar Shnong Umran Parila hynne ka sngi kila leit ban ai da ka jingthoh ha ka Myntri ka tnat ka koit ka khiah Dr. Ampareen Lyngdoh ba dawa ba dei ban pynbit pynbiang bad ban plie noh ïa ka Maternity and Child Hospital (MCH) kaba don ha Umsning Parila Ri-bhoi District.
Haba kren sha ki lad pathai khubor hadien ka jingwan ïakynduh ïa katei ka Myntri, u vice president ka HITO Ri-bhoi district bah Elvis Kyrsian ula ong ba kumba la iohi mynta kane ka Maternity and Child Hospital (MCH) kaba don ha Umsning Parila Ri-bhoi District ka long kum ka ïing kaba ym shym la pyndonkam shuh bad ka la don ruh ka jingshah tuh ki katto katne ki tiar na katei ka jaka.
U bah Elvis ula ong ba ka seng ha ryngkat bad ka Dorbar Shnong Umran Parila ki la kyrpad hakhmat naka myntri ka tnat ka koit ka khiah ban plie noh ïa ka MCH namar kane ka MCH la dep ban pyntrei naduh 2018 kaba kynthup Ia ki Quarters bad kiwei ki jingdonkam.
Ula ong kila kyrpad ruh iaka myntri ka tnat ka koit ka khiah ban shim khia ban pynbit pynbiang noh baroh ki jingdonkam hapoh katei ka hospital, naduh ki tiar ki tar bad ki nongtrei ba donkam khnang ban ioh ban plie noh ia katei jaka sumar na ka bynta ka jingmyntoi ba khraw jong ki paidbah.
“Ka jingwan jong ngi ka long ban kyrpad ïa ka myntri ka tnat ka koit ka khiah ba kan peit bniah noh ia katei ka jaka namar kumba ngi la ïohi mynta ka long kum ka iing jah” la ong u bah Elvis.
Na ka liang u Rangbah Shnong ka Umniangbyrai Barila u bah Pynshngaiñ Marbaniang ula ong ba ka jingplie ia katei ka MCH kan ai jingïarap ïa ki paidbah nongshong shnong ka Ri-bhoi District khamtam ia ki longkmie bad ki khyllung khynnah ba kin lait ban wan kiew sha sor Shillong namar ba ka jaka sumar ka la don ka jaka sumar kaba kham hajan.
U bah Pynshngain ula kyntu ruh iaka myntri ka tnat ka koit ka khiah ban thung nongtrei Casual Labour da katto katne ngut ki ban iarap ban pynkhuid ia ka sawdong sawkun jong ka khnang ban lait na ki jingjot jingpra jong kitei ki building bad ban buh ïa ki nongap pahara lane ki ‘Chowkidar’ ban lait na kino kino ki jingjah jong ki tiar ki tar na kane ka Hospital.
