Shillong, Iaiong 20: Ka High Powered Committee ka Meghalaya Legislative Assembly’s hynne ka sngi Palei kala ai ia ka jingmynjur ia ka design (jingpynwandur) ba thymmai jong u dome ka Iingdorbar Thaw Ain ka Jylla ha Mawdiangdiang bad kumjuh ruh ia ka sjingmang tyngka ia kane ka kam.
Kane ka rai jong ka HPC kala mih na ka jingialang kaba la lum da u Lamphang ka iingdorbar thawaiñ ka jylla u Thomas A. Sangma, ha kaba iadei bad ka jingtei iaka iingdorbar thawaiñ bathymmai jong ka jylla ha Mawdiangdiang.
Ha katei ka jingialang la wan ban iashimbynta da u Myntri Rangbah ka jylla u Conrad Kongkal Sangma, u Symbud Lamphang u Timothy D Shira, ki MLA kiba kynthup ia u Bah Charles Pyngrope, Bah Lahkmen Rymbui bad u Bah Banteidor Lyngdoh bad la iadonlang ruh u Chief Secretary ka jylla u Bah Donald P Wahlang, u Commissioner & Secretary jongka Meghalaya Assembly, u Dr. Andrew Simons bad kiwei kiwei ki heh ophisar.
Hadien ba la wai ka jingialang, u Lamphang ka iingdorbar ula pyntip ba ula lum ia ka jingialang jongka HPC ka long na ka bynta ban ai jingmynjur bad jingbit ia ka Design kaba thymmai jong ka Dome bad kumjuh ia ka bhah tyngka hadien ba kala don ka jingkiew ha ka jingpyntrei ia ka kam.
Ula ong ba ia katei ka Design kaba thymmai la dep ba nbishar bniah da ka IIT Roorkee bad IIT Guwahati bad ula ong, ba mynta ka jingtei iaka Building kan iaid noh shakhmat.
‘Ka HPC kala shong ban ai iaka jingmynjur (ia ka design bathymmai jong ka Dome) bad kumjuh ban ai jingmynjur halor ka jingdonkam shuh shuh iaka song tyngka namar ki kam kiba hap ban trei mynta kila nang mih shuh shuh” ong u Lamphang.
‘Hadien ka jingrakhe iaka Eid, yn sa sdang noh ia jingtreikam kaba pura” la ong u Thomas Sangma.
Ula pyntip ba ka HPC kala thung ia u Programme Monitoring Committee (PMC) katkum ka jingshem jong ka IIT Guwahati ha ka kaiphod halor ka jingkhyllem u Dome jong ka Assembly.
u Lamphang ula ong, ba la bthah ia ka tnad PWD & PMC ba kin khmih bniah ia ka bynta ia ka bynta ka baar jong ka jingtei ia katei ka building.
