Shillong, Lber 30 : U Nongialam ka Congress Legislature Party (CLP) Bah Ronnie V Lyngdoh ula ong ba kam don satia kano kano ka sienjam ban bujli noh ia u Nongialam jong ka Party (Meghalaya Pradesh Congress Committee) hapoh ka Jylla.
Ula kynthoh ia kane halor ka jingkylli la ka party kan bujli noh ia u President ba mynta ka MPCC bad MP ka Shillong ma Vincent H Pala namar ka jingbym lah leh bha jong ka Congress ha ka elekshon MLA ba dang shu dep ha Jylla. U ma Pala ula shah pynliem ha ka kyrtong ka NPP kong Santa Mary Shylla na Sutnga-Saipung Constituency.
Ka Congress party kala jop tang 5 seat ha ka Iingdorbar ba 59 ngut ki Dkhot.
U Bah Ronnie ula ong ba kam long satia kaba iahap ban tynrong ia ka jingkitkhlieh tang ha uwei u briew namar ka jingbym lah leh bha ha ka elekshon ba dang shu dep.
“Kam long kaba dei namar ka jingkitkhlieh hi ka dei kaba hap ban shim da ka seng baroh kawei ha ka jaka ban kynnoh ia baroh tang ha u Nongialam” ula bynrap.
U Bah Ronnie ula ong ba ka jingshah rem jong u President ka Jylla ka dei namar ka elekshon mynta kam kut tang ha ki ishu.
“Ki paidbah ki lah ban kwah ia ka jingkylla hynrei ynda la poi ka por ban shim rai, ki don shibun kiei kiei kiba mih ban pynbiej ne ialam bakla ia ki” ula ong.
Une u Nongialam ka CLP ula ong ba ki vote jong ka Congress kila pra hadien ba ki 17 ngut ki MLA kila ieh noh ia ka party shuwa ka elekshon MLA 2023. Ula ai nuksa ia kaei kaba jia ha East Shillong bad ong ba ka party ka ioh por tang 2-3 bnai ban shim rai ia u kyrtong hynrei watla katta ula don ha ka jingiakhun.
Ha kajuh ka por, une u Nongialam ka Congress ula ong ba ka party kala pynkhreh shaid shaid mynta ia ka elekshon jong ki Autonomous District Council bad ka elekshon MP ka Lok Sabha.
