Shillong, Lber 30: Ki lai tylli ki Unit jong ka KSU kiba kynthup ia ka Mynriang, Nonghali bad Diengpasoh Unit ha ka 29 tarik u Lber, kila leit jurip ia ka Public Health Centre (PHC) kaba don ha Diengpasoh bad lap ia kiba bun ki jingduna ha kane ka jaka ai jingsumar.
Ha katei ka jingleit jurip la iadonlang ki nongialam ka KSU Mawryngkneng Circle bad ki Seng Longkmie na ka shnong Diengpasoh.
Ha kane ka jingjurip, kine ki kynhun kila lap ia shibun ki jingduna naduh ka jingduna ki Doctor bad ki Nongtrei bad ka jingbym don ka kali kit nongpang bad ki nongtrei ki hap ban pyndonkam ia ka juh ka kamra ban shong lang bad ki nongpang.
Katkum ka kyrwoh na u Samla J.J. Lyngkhoi, General Secretary ka KSU Mynriang Unit, ula pynpaw ba ka Seng kala lap ba ka PHC kam don iaka Ambulance hynrei ka don pat ia u Driver ne nongniah kali bad la shu pyndonkam da ka kali Auto haduh mynta da kaba shu shim wai bad ka Sorkar hi ka siew bai wai ia kane ka kali.
Ka Seng ka pynpaw ia ka jingsngewlynngoh ba ka PHC kam don iaka Ambulance bad la shu wai tang da kali shimet bad ka Seng ka buh jing kylli mano ban bah khlieh lada jia eiei na ka bynta kito ki nongpang ba phah kit da kane ka kali khamtam iaki longkmie kiba armet.
“Namar kumba ngi tip ba kane ka PHC Diengpasoh ka dei kaba kdup ia shibun ki Shnong kiba don ha kine ki thain kata naduh Siejiong haduh Mynriang bad kiwei de ki Shnong. Ka Seng ka kyntu ia baroh ki paidbah lada ki lap kino kino ki jingeh kin wan ban iakynduh bad ka seng kan ai iaka jingiatreilang bad kane ka PHC khnang ban kyntiew shuh shuh ia kane ka PHC” ong u Samla J.J. Lyngkhoi.
Ka Seng kala kyntu ia ka Sorkar ba kan phaikhmat lem iaki jingdonkam kane ka PHC bad wat ki nongmihkhmat MLA/MDC ruh ba kin ailem iaka kti kamon ka kti kadiang ban kyntiew ia kane ka PHC.
Ka KSU kam kwah shuh ban dang iohsngew ia ki jingujor na ki paidbah halor kane nangne shakhmat hynrei ka kyntu ia baroh ki Nongtrei ba kin nang ia trei shitom bad ia treilang bad ka seng kaban leit ruh ban iakynduh iaki bor ba halor ban pyn sngew ia kine ki jingeh jongka PHC Diengpasoh.
