Shillong, Lber 30: Ka jingthmu jong ka Voice of the People’s Party (VPP) ban rah hapoh ka ïingdorbar thaw aiñ bad ban dawa pynkylla iaka bhah thungkam lane ka Reservation Policy kam dei naka bynta ban wanrah ka jingiasngewpher jingmut hapdeng kino kino ki jaitbynriew kiba don hapoh Meghalaya.
Ia kane la ong da u president ka VPP bah Ardent Basaiawmoit bad kane ka mih hadien ba ki sengbhalang na Rilum Garo Hills kum ka Achik Conscious Holistically Integrated Krima (ACHIK) bad ka Garo Student Union (GSU) lem bad kiwei kiwei de ki kynhun, kila pynpaw ia ka jingpyrshah halor ka jingdawa pynsangeh iaka Roster System bad pynkylla iaka bhah thungkam lane ka Reservation Policy jong ka jylla.
U bah Ardent ula ong ba ka VPP kam pyrshah iaka Roster System ne iaka rai jong ka ïing kashari ka Meghalaya High Court hynrei ka VPP bad kum u president ka Party u ieng haka nongrim ban dawa pynkylla iaka bhah thungkam lane ka Reservation Policy.
Ula ong ba kito ki briew bad ki seng kiba pyrshah iaka jingdawa ka VPP ki ide ban sngap bha iaka jingkren hapoh ka ïing dorbar naduh ba sdang haduh da kut namar kum ka Party bad u briew u ba don ka jingkitkhlieh, um kwah ba ka jingdawa kan wanrah ïa ka jingsngew pher jaidbynriew.
“Hapoh ka ïing dorbar ka jingpyrshah jong nga kam dei iaka Roster System, ka jingpyrshah jong ka VPP kadei halor ka jingpyntreikam iaka Roster System katkum ka Policy kaba mynta, ka don ka jingdkoh ha ka Reservation Policy kaba ka sorkar ka pyntreikam, donkam ban pynbeit bad pynbha shwa iaka Policy khnang ba kane kan ym long ka ba noh shilliang ne ka bym pynduh nong iano iano” la ong u bah Ardent.
U bah Ardent ula kam ba ki don shibun ki jingdkoh hapoh ka Reservation Policy bad lada ka sorkar kam pynbeit ia kane ka Policy, kan don ka jingduhnong kaba khraw ia kane ka thain bad iaki khun samla jong kane ka thain.
Ula ong ba ki paidbah ki donkam ban ai ka jingkyrshan namar ki don shibun ki jingdkoh hapoh kane ka Reservation Policy namar ba ka VPP kam kwah ban tuh ia ka hok kiwei bad kiwei ruh kim dei ban tuh ïa ka hok ka jaidbynriew u Khasi.
Nalor kane u bah Ardent ula ong ruh ba ka sorkar ka dei kaba thaw ia ki ain bad ki Policy kam dei ka ïng kashari hynrei ka ïing kashari ka peit kumno la pyntrei kam ia kita ki aiñ namar kata ka jingïakhih ka VPP ka dei pyrshah ïa ka Policy kaba thaw ka sorkar ym pyrshah ïa ka rai jong ka ka ïing kashari ka Meghalaya High Court.
