Ban pyntreikam ïa ka Roster System khlem da pynbeit ïa ka Resrvation Policy kan wanrah iaka jingduhnong:VPP

Date:

Share post:

Shillong, Lber 30: Ka jingpynrem bad jingpyrshah jong katto katne ki riewshimet bad ki kynhun ïa ka VPP namar ka jingdawa ban jurip bad sorjamin biang ïa ka bhah thungkam lane ka reservation policy bad ban pynsangeh mardor ïa ka jingtreikam ka Roster System katba dang ap ïa ka kaiphod, ka long kaei kaei kaba sngewsih, ka bym shym la khmih lynti bad ka bym shongnia.

Ia kane la pynpaw da u Nongaiktien ka VPP Dr Batskhem Myrboh ha ka kyrwoh bala phah hynne ka sngi, uba la pynpaw “Ka long ka jingshisha ba ka reservation policy kadei ka phang kaba ktah ïa ka jingsngew jaitbynriew hynrei kata kam dei pat ban long u mawjynthut ïa ka saiñ pyrkhat ba shongnia. Ym lah ban len ba ka reservation policy ha Meghalaya ka long ka bym don nongrim bad kaba lah shiliang ha kaba ïaki mat kum ka jingbun briew bad ka hok jong kiba don jingduna ha ki dkhot met bad kiwei kiwei de ki mat kiba long ki mawkhrum jong ka policy la kyntait war”.

“Ka jingpyntreikam ïa ka roster system khlem da pynbeit ïa ka policy kaba dkoh kan wanrah ïa ka jingduhnong ïaki samla jong kano kano ka jaitbynriew kiba hap ban long langkñia ïa ki jingbakla jong ki por bala leit noh” ong u Dr Myrboh.

“Ka jingkynnoh ba u President jong ka VPP, u Bah Ardent Miller Basaiawmoit, bad ïa ka Seng hi ba ka kynshoit ïa ka jingsngewpher jaitbynriew hapoh ka jylla, ka long kaba bakla jur bad ka bym don nongrim eiei ruh em” ula bynrap.

Kat kum ka jingong jong u “Ha ka jingshisha, u Bah Ardent ula ai ka jingkren ryngkat ki mat kiba shongnia shibun eh halor ka reservation policy bad ka roster system ha ka dorbar mang tyngka kaba dang shu dep hapoh ka ïing Dorbar Thawaiñ. U lah pynshai kdar ba um don jingpyrshah ne jingpihuiñ ïa kano kano ka jaitbynriew halor ka bhah thungkam hynrei tang ban wanrah ïa ka jingpynbeit khnang ba kan long kaba beit bad ka bym lah shiliang”.

“Ka Seng VPP kadei kaba la pynlong da ki briew kiba don ka jingkitkhlieh, kiba beit, kiba ieit ïa ka jingïashongsuk bad kiba kren ruh ïa ka jingshisha” ula bynrap.

Ula ong, kum ka Seng ka kyrpad ïaki paidbah jong ka jylla ba kin long kiba peitngor bad ban ym ngat ha ka shrip jong riewshimkabu kiba pyrshang ban pynthohbria ïa ka Seng.

“Ngi ïohi ba ka don ka jingpyrshang ban pynsngewthuh bakla shaphang ka Seng VPP khnang ba kan ym lah ban suhthied sha kiwei pat ki bynta jong ka jylla namar ba ka Seng ka la pynkhihwin ïa ka saiñ pyrthei jongki phlan duman, ki riewarsap bad bam sap. Ka nongrim jong ka party ka long ban wanrah ia ka sainpyrthei kaba khuid ba lait na ki kam bamsap bad leh jubor ha ka rukom treikam jongki tnad bapher bapher jong ka sorkar kynthup ruh ia ki bor pyniaid ha ka thungkam thungjam” ong u Nongaiktien ka VPP.

Ka Seng VPP ka khot bad wer sngewbha ïaki paidbah jong ka rilum Garo ban ïasnohkti bad ka Seng ban wanrah ïa ka roi ka par bad jingïaid shaphang jong ka jylla ha baroh ki liang.

Ka seng VPP kadei tang maka, ka Seng kaba shisha ha ka jylla ka ban wanrah ïa ka synshar khaddar kaba larkam bad ba khuid. Kito ki seng saiñ pyrthei kiba la ju ïoh jingkyrshan na rilum Garo ha ki por kiba la dep kim shym la lah ban wanrah jingroi ha rilum Garo. Ki don ki seng saiñpyrthei kiba sait ksew pyrshah ïa ka jingpynkylla ïa ka reservation policy hynrei kidei ma ki pat ki bym ju pushe ban pynroi ïa ka rilum Garo. Ka jingbym shimkhia na ka bynta ka pule puthi bad kiwei kiwei kadei ka jingshukor jong kine ki seng ïaki paidbah jong ka rilum Garo. Haba ki samla kim long kiba la khreh ban rung sha ka lawei jong ki jingkob, ki seng saiñ pyrthei kidei ban shim ïa ka jingkitkhlieh.

Ka seng VPP kala kut jingmut ban pynkupbor ïaki samla khlem da shah shiliang ïa kano kano ka jaitbynriew bad ruh ban pynkhreh ïa ki ban long kiba ïa ryngkat dor bad kiwei pat ki samla ha ka ri India hi baroh kawei.

Share post:

spot_img

Popular

More like this
Related

Hukum ka Iingkashari ia ka Sorkar ban bud ia ki kyndon ban wanrah jingkhuid ha pung Umiam

Shillong, Rymphang 24 : Ka Iingkashari Meghalaya High Court...

Govt to issue notification on age limits for jobs soon

SHILLONG, FEB 26: Chief Minister Conrad K Sangma on...

Shen yn pynmih jingpynbna ka Sorkar halor u pud rta ioh kam

Shillong, Rymphang 26 : U Myntri Rangbah ka Jylla...

Yn pynlong jingiakhih ki ar seng namar ka jingslem ban pynmih ia ka resol DSC

Nongpoh, Rymphang 26: Ka Ri Bhoi People’s Council (RBPC)...