Shillong, Jylliew 29: U National General Secretary ka AITC Abhishek Banerjee hynne ka sngi balang ula ong b aka AITC ka long kaba kloi ban kyrshan ia ka kyrtong President jong ka sorkar NDA ba ialam da ka BJP lada kane ka Sorkar ka lah ban pynkut noh ia ki kam thombor pyrshah ia ki paid riewlum hapoh ka Ri.
“Ai ba kin (BJP) mih shakhmat bad ong ba baroh 90% na ki jingthombor ia ki ST kan hiar noh sah u nod. Nga burom bha bad niewkor bha ia ka Droupadi Murmi bad ki kam jong ka ha ka sain pyrthei. Ai ba kan mih bad ong ba hadien ba ka shah jied kum ka President, ka Scholarship ki SC/ST kan ym hiar shuh bad ki Jylla kum ka Gujarat, Uttar Pradesh, Karnataka bad Madhya Pradesh kiba don hakhlieh duh ha ka jingthombor ia ki Kynthei ST bad ki Jaidbynriew ST kin ym don shuh kum kine ki jingthombor” ong u Abhishek haba iakren bad ki nongthoh khubor.
“Ai ba kan mih bad ong ba ngan ang ia ka shyntur jong nga bad ba ngan ym sngap ia kaei kaba ka Sorkar lane u Myntri Rangbah Duh lane u Myntri Kam Pohiing ki sngew bad ban long ka nongtynjuh ia ka Sorkar bad ban pynthikna baka Sorkar kan treikam hapoh ki kyndon jong ka Riti Synshar ka Ri” ula bynrap bad ong “Ai ba kan ong ba kan long shisha ka nongsumar ia ka Riti Synshar ka Ri bad hangta ngin sa kyrshan ia ka”.
Haba pynpaw ba ka AITC kam ngeit satia tang ha ka ktien, u Abhishek ula ong ba ka Party jong u kan nym kyrshan satia ia kano kano ka bym iahap.
“Ngi la ioh ia u President uba dei u Schedule Caste ha kine ki san snem bala noh. Hato phi la iohi ba u President ka Ri u nud ban ang wat tang shi kyntiew ruh? U President uba dei na ka Schedule Caste u khlem shah khot satia sha ka jingbuh maw nongrim ia ka Ram Mandir.
Na ki 200 ngut ki Pundit, tang uwei u Dalit ruh u khlem shah khot” ula ong.
Une u Nongialam ka AITC ula ong ba ka BJP ka dei ban pynbeit ia kine kiei kiei, lada ka kwah ban burom ia ki jaidbynriew Schedule Tribe lem kumta kan don jingmut aiu.
“Lada phi kwah ban pynkupbor ia ki Jaidbynriew Riewlum, ai ha u/ka ban trei laitluid lem kumta ka dei tangka buit ban myntoi ha ka kam sain pyrthei” ula kynnoh.
